Samarqandga yilning birinchi choragida 255 ming nafar mahalliy sayyoh keldi. Bu esa o`tgan yilga, ya`ni pandemiyadan oldingi davrga nisbatan 3 barobarga ko`p demakdir, – dedi xalq deputatlari viloyat Kengashining bugun o`tkazilgan sessiyasida hisobot bergan Samarqand viloyati turizmni rivojlantirish departamenti boshlig`i D.Narziqulov.
Birgina Registon majmuasiga o`tgan yili 14-15 mart kunlari 6056 nafar, joriy yilning 10-11 aprel kunlari esa 24189 nafar kelgani kuzatildi.
Ichki turizmni rivojlantirishga qaratilgan e`tibor natijasida joriy yilning 28 mart sanasidan “Samarqand – Urganch – Samarqand”, “Samarqand – Farg`ona – Samarqand”, “Samarqand – Namangan – Samarqand” yo`nalishlarida muntazam aviaparvozlar yo`lga qo`yildi.
– Aholi o`rtasida sayohatni ommalashtirish va sayohat qilishga qulaylik yaratish maqsadida, dam olish va bayram kunlari taqvimi sayohat uchun maqbullashtirildi – dedi D.Narziqulov. – Jumladan, 5 ta rasmiy bayram kunlari bayramlarni nishonlash davrida qo`shimcha ishlanmaydigan kunlar 3 kundan kam bo`lmagan muddatga belgilandi. Oilaviy sayohatlarni nazarda tutuvchi yillik asosiy ta`til hisobidan 5 ish kunidan kam bo`lmagan “oilaviy sayohat ta`tili” tizimi joriy qilindi. Shuningdek, “Ayollar daftari”ga kiritilgan xotin-qizlar sayohatini tashkil etish bo`yicha ham reja-jadval tasdiqlangan bo`lib, ushbu reja-jadvalga muvofiq sayohatlar tashkil etilmoqda va oylik ma`lumotlar kiritib borilmoqda.
Joriy yilning 2 mart kuni “Sayyohlik mavsumining ochilishi” munosabati bilan keng ko`lamda tadbir tashkil etildi. Shu kuni viloyatdagi barcha madaniy meros va muzeylarga kirish bepul amalga oshirildi.
“Navro`z – umumxalq bayrami” munosabati bilan bayram arafasida Samarqand shahrining 10 ta hududida hamda “Konigil – turizm qishlog`i”, “Orzu Mahmudov” gastronomik ko`chasi, “Teshiktosh” maskani kabi yangi tashkil etilgan sayyohlik ob`ektlarida bayram tadbirlari tashkil etildi.
29 mart – 4 aprel kunlari Samarqand viloyatida ilk marotaba yoshlar sayyohlik festivali va sport sayyohligi yo`nalishi bo`yicha O`zbekiston chempionatiga respublika hududlaridan 240 nafar ishtirokchi va 1000 ga yaqin mahalliy sayyohlar jalb qilindi. Yil yakuniga qadar yana o`ndan ortiq xalqaro tadbirlar o`tkazilishi rejalashtirilgan.
Manba: UzA
