“Uzbekistan Airways” aksiyadorlik jamiyati matbuot xizmatining xabar qilishicha, qator mahalliy parvozlar 33 foizdan 50 foizgacha chegirmalar bilan tiklandi. Shu bilan birga, ichki reyslar soni ko`paytirilib, yangi qatnovlar yo`lga qo`yildi. Bu haqda O`zA ma`lum qildi.
Samarqand-Urganch, Samarqand-Farg`ona va Samarqand-Namangan, Termiz-Farg`ona yo`nalishida qo`shimcha reyslar yo`lga qo`yildi. Bundan tashqari, garchi raqamlar parvoz narxi er usti transport narxidan biroz oshib ketganini ko`rsatsa-da (yuksiz 126 300, yuk bilan 151 600 so`m), 2018 yildan buyon to`xtagan Toshkent-Andijon havo qatnovi qayta tiklandi. Toshkentdan Farg`ona vodiysi shaharlariga esa aviachipta bir xil – poytaxtdan Farg`ona, Namangan va Andijonga – 127 000 so`mdan belgilandi. Xo`sh, aviachiptalar narx-navosidagi o`zgarishlar haqida yurtdoshlarimiz qanday fikrda?
Shu o`rinda yana bir ma`lumot, aviakompaniya Toshkentdan Termiz, Buxoro, Samarqandga ham muntazam qatnovlarni amalga oshiradi, 14 maydan boshlab esa Toshkentdan Navoiyga aviaqatnovlar tiklanadi. Ushbu yo`nalishlardagi aviachiptalar narxi avvalgi holatga ko`ra 34 foizdan 45 foizgacha arzonlashtirilganini kuzatish mumkin:
• Toshkent-Termiz – 341 000 so`mdan. Qatnovlar haftaning dushanba, payshanba va shanba kunlari;
• Toshkent-Buxoro – 215 000 so`mdan. Qatnovlar haftaning chorshanba, shanba va yakshanba kunlari;
• Toshkent-Navoiy – 215 000 so`mdan. Qatnovlar haftaning seshanba va juma kunlari amalga oshiriladi.
• Toshkent – Samarqand – 114 000 so`mdan, aviaqatnovlar haftaning seshanba va shanba kunlari amalga oshiriladi. Shuningdek, aviakompaniya qatnovlar jadvaliga Samarqanddan yurtimizning boshqa viloyatlariga ham maqbul narxlarda qatnovlar kiritiladi, deya qayd etilgan berilgan ma`lumotlarda.
Yana bir yangilik: aviakompaniya 10 maydan Termizni Farg`ona bilan bog`lovchi yangi qatnovni yo`lga qo`ydi. Termizdan Farg`onaga qatnov dushanba kunlari, Farg`onadan Termizga esa payshanba kunlari amalga oshirilishi hamda aviachipta narxi har ikkala yo`nalish uchun ham 316 000 so`mdan belgilangan, deb ma`lum qildi kompaniya matbuot xizmati.
Xabar berilishicha, Samarqand shahrida ikkinchi xab tashkil etilgan bo`lib, bugungi kunda ushbu shahardan doimiy ravishda (Toshkent qatnovidan tashqari) uchta shahar – Farg`ona, Namangan va Urganchga ham mahalliy aviaqatnovlar amalga oshirilmoqda. Aviachiptalar narxi har uchala yo`nalishda ham 190 000 so`mdan boshlanadi. Bu o`z navbatida aholi mobil darajasi ortishi va yurtimizdagi ichki turizmni rivojlanishida muhim ahamiyat kasb etadi. Aviaqatnovlar quyidagi kunlarda amalga oshiriladi:
• Samarqanddan Namanganga – chorshanba va shanba kunlari;
• Samarqanddan Farg`onaga – dushanba, seshanba, juma va yakshanba kunlari;
• Samarqanddan Urganchga – dushanba, chorshanba, juma va yakshanba kunlari.
