Xabaringiz bor, shu yilning 14 may kuni davlatimiz rahbari Shavkat Mirziyoev Respublika ixtisoslashtirilgan onkologiya va radiologiya ilmiy-amaliy tibbiyot markazida ham bo`lib, u erda davolanayotgan bolajonlar holidan xabar olgan edi.
Uchrashuv chog`ida bemor bolalarning har biri bilan davlat rahbarining shaxsan o`zi suhbat qildi, ularning muolajalari uchun zarur sharoitlarni muhayyo qilish, ularning tezroq to`laqonli hayotga qaytishlari uchun mutasaddilarga tegishli topshiriqlar berildi. SSV Matbuot xizmati shu kunlarda butun mamlakatning e`tiborida turgan tibbiyot markazining bolalar bo`limida davolanayotgan bemorlar va ularning ota-onalarining kayfiyati va taassurotlarini o`rgandi.
Prezidentimiz bilan uchrashuvda “katta bo`lsam "GAI" xodimi bo`laman” degan qizaloqni eslaysizmi? Uning ismi Sabrina. Namangan viloyati Chust tumanidan kelgan Sabrina Insofalieva 2003 yil tug`ilgan. Kuni kecha Ichki ishlar vazirligi mas`ullari yo`l harakati xavfsizligi xodimi maxsus libosi, IIV YHXBB faxriy a`zolik guvohnomasi hamda esdalik sovg`alar bilan tashrif buyurishganida Sabrinaning quvonchining cheki yo`q edi.
Foto: SSV Matbuot xizmati.
Ikki yildan beri o`ng son orqa yuzasi neyrogen sarkomasi tashxisi bilan davolanib kelayotgan qizaloqqa Prezidentimiz bilan yuzma-yuz suhbatda chet eldan o`ng chanoq-son bo`g`iniga protez olib kelishga va`da qilindi.
Sabrina onasi Feruza Muhsinova bilan. (Foto: SSV Matbuot xizmati).
— Prezidentimiz bilan uchrashish etti uxlab tushimizga kirmagan edi. Alloh mushkulimizni davlatimiz rahbari orqali oson qilishni taqdir qilgan ekan, — deydi Feruza opa Muhsinova. — Bugun qizimning quvonchdan dardlari arigandek bo`ldi. Shunchalik e`tibor berib, har bir bemorning ehtiyojini o`rganib, ularni muhayyo qilishga tayyor turgan insonlar sabab og`ir dard bilan kurashayotgan bolamning ko`zlari kulganini ko`rish nasib qilganiga shukr qilyapman. Qizimning shifo topishi uchun mehnati singgan barcha tibbiyot xodimlaridan cheksiz minnatdormiz. Kasb-korlaridan elning rahmatini olib yurishsin, — deydi suhbatdoshimiz.
— Prezidentimiz kelganlarida men muolaja olayotganim sabab yonlariga chiqa olmagandim. Hech kutilmaganda o`zlari “Sochida O`zbekiston bayrog`ini baland ko`tarib kelgan qizim senmisan?” deb palatamizga kirib kelganlarida o`zimni yo`qotib qo`ydim, — deya gap boshlaydi bolalar bo`limining 9-palatasida davolanayotgan Nodirabegim Qosimova.
Nodirabegim markaz bo`lim mudiri Tojiddin Mustafoev bilan. (Foto: SSV Matbuot xizmati).
Nodirabegim asli badiiy gimnastika bilan shug`ullanar ekan. Ushbu sport turi bo`yicha Rossiyaning Sochi shahrida o`tgan xalqaro musobaqada gran-prini qo`lga kiritib kelgan. Keyinchalik oyog`ida o`simta borligi taxmin qilinib, Respublika ixtisoslashtirilgan onkologiya va radiologiya ilmiy-amaliy tibbiyot markaziga yotqizilgan. Jamoat ishlarida va sport turnirlarida faol qizaloq og`ir xastalikka chalinganini eshitgan ota-onaning holatini tasavvur qilish qiyin emas. Aholining ijtimoiy himoyaga muhtoj qatlamlarining sog`ligini tiklash uchun davlatimiz tomonidan ajratilgan order tizimi oilaning joniga oro kirdi.
Foto: SSV Matbuot xizmati.
— Bu shifoxonaga kelganimizga ko`p bo`lmadi, — deydi Nodirabegimning onasi Komila Ataxanova. — Prezidentimiz bilan uchrashuvga chiqqanimizda ular hammaning hol-ahvoli va ehtiyojini so`rab qoldilar. Menga navbat etganida xijolat tortdim. Mening-ku to`rt mucham sog`, qizimning ortidan kelgan bo`lsam. Nodira qizim palatada qolgan edi. Prezidentimiz “unda palatasiga borib ko`ramiz”, dedilar. Esdalik uchun suratlarga tushilganidan so`ng, meni chaqirganlarida shoshib qoldim. Hammadan ajralib, davlat rahbari bilan qizimning palatasiga yo`l oldik. Ularni oddiy samimiy inson ekani haqida eshitgan edim. Bir bemor qizning ko`nglini ko`tarish uchun qilgan alohida e`tiboriga guvoh bo`lib, bunga yana bir bor amin bo`ldim.
