Bugun poytaxtdagi «TEXNOPARK» mas`uliyati cheklangan jamiyatga Ukraina Savdo-sanoat palatasi raisi Valeriy Korol boshchiligidagi ishbilarmon doiralar vakillaridan iborat delegasiya keldi, deb xabar bermoqda «Dunyo» AA.
Ukraina delegasiyasi tarkibi sanoat va ishlab chiqarish korxonalari, savdo, farmasevtika kompaniyalari hamda xususiy tadbirkorlardan iborat.
Mehmonlar «TEXNOPARK»ning sanoat ishlab chiqarish salohiyati hamda korxona tomonidan ishlab chiqarilayotgan mahsulot turlarini ko`zdan kechirdi.
Delegasiya a`zolari lift va eskalatorlar, muzlatgichlar, qolip va shtamplar, suv nasoslari, sanoat kondisionerlari, shuningdek, «Osten» brendi ostidagi «aqlli» gaz hisoblagichlarini ishlab chiqarish jarayonini kuzatdi.
Bundan tashqari, Ukraina delegasiyasi metall konstruksiyalar va sendvich panellar, deraza va eshiklar uchun aksessuarlar, panel radiatorlar, shuningdek, alyuminiy kompozit panellari ishlab chiqarish majmualari ishi bilan tanishdi.
20 may kuni Toshkentda O`zbekiston - Ukraina Ishbilarmonlar kengashining yig`ilishi, shuningdek, biznes-forum hamda “V2V” shaklidagi uchrashuvlar bo`lib o`tadi. Tadbirlar doirasida hamkorlikni rivojlantirish rejalari, Ukrainada o`zbek mahsulotlari hamda Ukraina mahsulotlarining O`zbekistondagi ko`rgazmalarini tashkil etish masalalari muhokama qilinadi. Biznes-forum doirasida qator ikki tomonlama shartnomalarning imzolanishi kutilmoqda.
Eslatib o`tamiz, O`zbekiston va Ukraina o`rtasidagi o`zaro savdo hajmi 2020 yilda 449,6 million dollarga etdi, bu ko`rsatgich 2019 yilga nisbatan (345 million dollar) 130 foizga ko`pdir.
