— Yigirma yildan buyon astma bilan og`riyman. Qilmagan muolajam qolmadi hisob. Kasallik xurujlaridan qanday himoyalanish mumkin? Bu dardning davosi bormi o`zi?
Anvar, Toshkent shahri, Sergeli tumani
Savolga tibbiyot fanlari nomzodi, shifokor – allergolog Feruza KARIMOVA javob beradi:
– Bronxial astma – nafas siqilishi, xushtaksimon tarzda xirildoq nafas olish, yo`tal va nafas yo`llarining balg`am bilan to`lishi kabilar bilan xarakterlanadi. Kasallik mavsum o`zgarishlarida avj olishi mumkin. Xususan, allergenlar ta`siri faollashgan bahor va kuz oylarida astma xurujlari ko`payadi. Nafas siqishi kuzatilganida diafragma sohasida kuchli og`riq paydo bo`ladi. Xuruj yo`tal tutishi bilan birgalikda kelib, bronxlar ichki yuzasini qoplab turgan balg`am chiqarib tashlangach, bemor ahvoli engillashishi mumkin. Kasallik xurujida o`pka alveolalarida gazlar almashinuvi keskin susayadi. Bu esa organizmning kuchsizlanishi, nutq muammolari va taxikardiyani keltirib chiqaradi.
Ayrim bemorlarda astma xuruji jismoniy zo`riqishdan so`ng kuchaysa, ba`zilar sovuq havodan nafas olganida ham og`irlashib qoladi. Bu organizmning individual xususiyatiga bog`liq. Astma aniqlanganida kasallik pog`onasiga ko`ra turli dori vositalari va fiziomuolaja (nafas yo`llari gimnastikasi, mashqlar, suzish va boshqa chiniqtiruvchi usullar) lar buyuriladi. Davolovchi shifokoringiz buyurgan muolaja va davo choralarini kanda qilmasangiz xurujlarning oldini olishga erishish mumkin.
