Ijtimoiy tarmoqlarda O`zbekistonda emlangan fuqarolarga niqob taqmaslikka ruxsat berilishi to`g`risida asossiz ma`lumotlar tarqatilmoqda. Holat yuzasidan SSV ma`lumot berdi.
Koronavirusga qarshi kurashish shtabi a`zosi Sevara Ubaydullaevaning koronavirusga oid savollar yuzasidan o`tkazilgan brifingda bergan javobi bunga asos qilib ko`rsatilmoqda.
Aslida mutaxassis ayrim davlatlarda aholining 60-70 foizi to`liq emlanganidan keyingina vaksina qabul qilganlar niqobsiz yurishi va ijtimoiy masofani saqlamasligi mumkin bo`lgani haqida aytgan edi.
Holbuki, yurtimizda dastlab 4 million nafarga yaqin xavf guruhiga kiruvchi fuqarolar emlanishi ko`zda tutilgan. 34 million nafardan oshiq fuqaro yashaydigan mamlakatda aholi niqobsiz yurishi uchun kamida 15 million nafardan ortiq kishi emlanishi kerakligi — oddiy arifmetika.
Shuning uchun emlanganlar niqobsiz yurishi haqidagi mish-mishlar haqiqatga zid bo`lib, jamoat joylarida tibbiy niqobdan foydalanish tartiblariga amal qilish barcha uchun majburiy.
