Bugun 24 may kuni Milliy matbuot markazida Maktabgacha ta`lim vazirligi mas`ullari ishtirokida “Maktabgacha ta`lim tizimida davlat-xususiy sherikligi islohotlarining samarali natijalari” mavzusida matbuot anjumani o`tkazildi. Bu haqda "Darakchi" muxbiri Sardorbek Rahmonqulov xabar qilmoqda.
Tadbirda so`zga chiqqan Davlat xususiy sheriklik asosidagi maktabgacha ta`lim tashkilotlari faoliyatini tashkil etish boshqarmasi boshlig`i Abdug`ulom Hakimov shu turdagi MTTlarining bugungi kundagi holati haqida ma`lumot berdi.
Uning keltirishicha,O`zbekiston Respublikasida 2020 yilning oxiriga kelib 18 254 ta maktabgacha ta`lim tashkiloti faoliyati yo`lga qo`yilgan bo`lib, shundan:
- 6 197 tasi davlat;
- 12 057 tasi nodavlat (788 ta xususiy, 10 244 ta oilaviy va 1 025 tasi DXSh asosidagi) maktabgacha ta`lim tashkilotlari hisoblanadi.
Yillar hisobiga oladigan bo`lsak:
- maktabgacha ta`lim vazirligi tashkil etilgan 2017 yilda 5 211 ta;
- 2018 yilda 7 104 ta;
- 2019 yilda esa 13 530 ta maktabgacha ta`lim tashkilotlari faoliyat olib borgan.
Qamrov esa...
Bugungi kunga kelib, 3-7 yoshli bolalarning 60 foizi, shu jumladan, 6 yoshdagi bolalarning 75 foizi maktabgacha ta`lim bilan qamrab olingan (2017 yilda – 27,7 %, 2018 yilda – 37,7 %, 2019 yilda esa 52,3 %ni tashkil etgan).
DXSh asosidagi MTTlari holati
Yig`ilishda keltirilishicha, maktabgacha ta`lim sohasida nodavlat sektorni rivojlantirishning zamonaviy mexanizmlari, xususan davlat-xususiy sheriklikning 10 ga yaqin shakllari joriy etib kelinmoqda. 2018-2020 yillarda davlat-xususiy sheriklik asosida 11 269 nafar tadbirkorlar tomonidan 352 431 quvvatga ega nodavlat maktabgacha ta`lim tashkilotlari faoliyati yo`lga qo`yildi hamda 33 679 ta yangi ish o`rinlari yaratilgan. Xususan, 104 524 quvvatga ega 1 025 ta davlat-xususiy sheriklik (shundan, 7 500 quvvatga ega 76 ta loyiha tadbirkorlarning o`z mablag`i hisobidan) hamda 247 907 quvvatga ega 10 244 ta oilaviy nodavlat bog`chalar faoliyati yo`lga qo`yilgan. 2020 yilda 333 nafar tadbirkorlar tomonidan 45 427 quvvatga ega davlat-xususiy sheriklik hamda 103 175 quvvatga ega 4 160 ta oilaviy nodavlat bog`chalar faoliyati yo`lga qo`yilishi orqali respublika bo`yicha 148 602 qo`shimcha quvvat va 12 360 ta yangi ish o`rinlari yaratildi. Natijada, bolalarni maktabgacha ta`limga qamrab olishda davlat-xususiy sheriklik ulushi 2019 yilga nisbatan 14,0 foizdan 20,7 foizga oshirilgan.
“Bolalar bog`chasi” ochmoqchi bo`lganlar...
Matbuot anjumanida jurnalistlar tomonidan bu bo`yicha huquqiy asos so`ralganida Abdug`ulom Hakimov MTTlarning 10 ga yaqin turlari borligi va ularni tashkil qilish tartiblari “Maktabgacha ta`lim tizimini yanada rag`batlantirish va rivojlantirish chora-tadbirlari to`g`risida”gi PQ-3651 sonli Prezident qarori hamda “Maktabgacha ta`lim sohasida davlat-xususiy sheriklik shakllarini yanada kengaytirish chora-tadbirlari to`g`risida”gi 944-sonli Vazirlar Mahkamasi qarorida batafsil belgilab qo`yilganini ma`lum qildi.
