Бугун 24 май куни Миллий матбуот марказида Мактабгача таълим вазирлиги масъуллари иштирокида “Мактабгача таълим тизимида давлат-хусусий шериклиги ислоҳотларининг самарали натижалари” мавзусида матбуот анжумани ўтказилди. Бу ҳақда "Даракчи" мухбири Сардорбек Раҳмонқулов хабар қилмоқда.
Тадбирда сўзга чиққан Давлат хусусий шериклик асосидаги мактабгача таълим ташкилотлари фаолиятини ташкил этиш бошқармаси бошлиғи Абдуғулом Ҳакимов шу турдаги МТТларининг бугунги кундаги ҳолати ҳақида маълумот берди.
Унинг келтиришича,Ўзбекистон Республикасида 2020 йилнинг охирига келиб 18 254 та мактабгача таълим ташкилоти фаолияти йўлга қўйилган бўлиб, шундан:
- 6 197 таси давлат;
- 12 057 таси нодавлат (788 та хусусий, 10 244 та оилавий ва 1 025 таси ДХШ асосидаги) мактабгача таълим ташкилотлари ҳисобланади.
Йиллар ҳисобига оладиган бўлсак:
- мактабгача таълим вазирлиги ташкил этилган 2017 йилда 5 211 та;
- 2018 йилда 7 104 та;
- 2019 йилда эса 13 530 та мактабгача таълим ташкилотлари фаолият олиб борган.
Қамров эса...
Бугунги кунга келиб, 3-7 ёшли болаларнинг 60 фоизи, шу жумладан, 6 ёшдаги болаларнинг 75 фоизи мактабгача таълим билан қамраб олинган (2017 йилда – 27,7 %, 2018 йилда – 37,7 %, 2019 йилда эса 52,3 %ни ташкил этган).
ДХШ асосидаги МТТлари ҳолати
Йиғилишда келтирилишича, мактабгача таълим соҳасида нодавлат секторни ривожлантиришнинг замонавий механизмлари, хусусан давлат-хусусий шерикликнинг 10 га яқин шакллари жорий этиб келинмоқда. 2018-2020 йилларда давлат-хусусий шериклик асосида 11 269 нафар тадбиркорлар томонидан 352 431 қувватга эга нодавлат мактабгача таълим ташкилотлари фаолияти йўлга қўйилди ҳамда 33 679 та янги иш ўринлари яратилган. Хусусан, 104 524 қувватга эга 1 025 та давлат-хусусий шериклик (шундан, 7 500 қувватга эга 76 та лойиҳа тадбиркорларнинг ўз маблағи ҳисобидан) ҳамда 247 907 қувватга эга 10 244 та оилавий нодавлат боғчалар фаолияти йўлга қўйилган. 2020 йилда 333 нафар тадбиркорлар томонидан 45 427 қувватга эга давлат-хусусий шериклик ҳамда 103 175 қувватга эга 4 160 та оилавий нодавлат боғчалар фаолияти йўлга қўйилиши орқали республика бўйича 148 602 қўшимча қувват ва 12 360 та янги иш ўринлари яратилди. Натижада, болаларни мактабгача таълимга қамраб олишда давлат-хусусий шериклик улуши 2019 йилга нисбатан 14,0 фоиздан 20,7 фоизга оширилган.
“Болалар боғчаси” очмоқчи бўлганлар...
Матбуот анжуманида журналистлар томонидан бу бўйича ҳуқуқий асос сўралганида Абдуғулом Ҳакимов МТТларнинг 10 га яқин турлари борлиги ва уларни ташкил қилиш тартиблари “Мактабгача таълим тизимини янада рағбатлантириш ва ривожлантириш чора-тадбирлари тўғрисида”ги ПҚ-3651 сонли Президент қарори ҳамда “Мактабгача таълим соҳасида давлат-хусусий шериклик шаклларини янада кенгайтириш чора-тадбирлари тўғрисида”ги 944-сонли Вазирлар Маҳкамаси қарорида батафсил белгилаб қўйилганини маълум қилди.
