Bahor kelganini nafaqat tabiatning yangilanishi, balki ayollarimizning ochilib-sochilib yurishidan ham bilsa bo`ladi. Bunga sabab bo`lgan yana bir omil: 8 mart – Xalqaro xotin-qizlar bayrami! Mazkur sanani hamma turlicha kutib oladi. Xo`sh, oilada yagona ayol bo`lgan xonanda ShAHZODA bu sanani qanday qarshi olar ekan?..
8 MART MEN UChUN...
Shahzoda, xonanda: — Ochig`i, ayollar bayramida qandaydir o`ziga xos, kutilmagan syurprizlarni kutmayman. Chunki men uchun 8 mart – onalar bayrami, bu tushuncha menga yoshligimdan meros. To`g`ri, o`zim ham onaman, lekin baribir 8 mart – onamni tabriklaydigan kun xolos.
Bayram soat 00.00ga bong urganidan boshlanadi...
— 8 mart sanasida birinchilardan bo`lib turmush o`rtog`im tabriklaydi. Aniqrog`i soat 00.00ga bong urib, 8 mart kirib kelganidan darak berganida bir quchoq qizil atirgullar bilan kayfiyatimni ko`taradi. Hatto tug`ilgan kunim ham xuddi shu tarzda o`tadi (samimiy kuladi). Bu juda yoqimli jarayon. Va kechga tomon bayramni oilamiz “yigit”lari bilan har yili bir xil tarzda to`kin dasturxon atrofida nishonlaymiz.
O`g`limning o`zi men uchun katta SOVG`A!
— O`g`lim Solix juda e`tiborli, birorta bayramni nazaridan chetda qoldirmaydi. Besh yoshligidan buvisi va menga o`z qo`li bilan turli sovg`alar tayyorlardi. Kichkintoyim Xolidga kelsak, uning o`zi men uchun katta SOVG`A (miriqib kuladi)! Sira yodimdan chiqmaydi, Solix 11 yoshida xuddi kattalardek men uchun atay sovg`a xarid qilgan. Avvaliga “Pulni qaerdan oldi ekan? Yo buvisidan yordam so`raganmikan?” degan savollar paydo bo`lgan. Keyin bilsam, biz maktabi uchun deb bergan pullarni yig`ib, sovg`a uchun ishlatgan ekan O`shanda meni hayratlantirgan Solixning uddaburonligini hozir kulib eslayman.
Benihoya yoqimli tabrik...
— Turmush o`rtog`im gul sovg`a qilishni juda yaxshi ko`radi. Eng qizig`i, qanday bayram bo`lishidan qat`iy nazar doim bir xil: bir quchoq qizil atirgullarni qabul qilib olaman. Oldinlari “Nega hamisha gul sovg`a qiladi?” deb o`ylardim va buning javobini topdim. Turmush o`rtog`im bir so`zli, hayotiy qoidalarini o`zgartirmaydigan inson. Bu uning xatti-harakatida ham sezilib turar ekan. Shu sabab bayramlarda meni qanday sovg`a kutishini avvaldan bilaman (kuladi). Lekin sira bu kabi sovg`alar kutgan emasman. Biroq turmush o`rtog`imning e`tibori, tabrigi men uchun muhim va benihoya yoqimli!
Birinchi bo`lib tabriklayman...
— Ayollar bayrami kuni eng avvalo onamni, so`ng uyimizda ishlab, menga yaqindan yordam beradigan xodimalarimizni albatta tabriklayman. Ancha yillar oldin rahmatli buvimning ham ko`nglini olardim. Maxsus kunlarda yaqinlarimni muborakbod etish sira yodimdan chiqmaydi.
Sadoqat ALLABERGANOVA tayyorladi.
