Shu yilning 14 may kuni davlatimiz rahbari Shavkat Mirziyoev Respublika ixtisoslashtirilgan onkologiya va radiologiya ilmiy-amaliy tibbiyot markazi va Respublika ixtisoslashtirilgan gematologiya ilmiy-amaliy tibbiyot markazlarida bo`lib, shu kunning o`zida sohadagi muammolar yuzasidan videoselektor yig`ilishi o`tkazgan edi.
Yig`ilishda tilga olingan masalalarni hal qilish va sohaga eng ilg`or texnologiyalarni jalb qilish maqsadida “Aholiga gematologiya va onkologiya xizmatlarini ko`rsatish tizimini yanada takomillashtirish to`g`risida”gi Prezident qarori qabul qilindi.
Ushbu qarorda gematologiya va onkologiya yo`nalishlarida amalga oshirilayotgan islohotlarni izchil davom ettirish, ko`rsatilayotgan tibbiy xizmatlar sifati, ko`lami va samaradorligini oshirish, bemorlarni zarur dori vositalari bilan ta`minlash, shifoxonalarni zamonaviy laboratoriyalar va tibbiy texnikalar bilan jihozlash kabi masalalarni hal etish ko`zda tutilgan.
