Ijtimoiy tarmoqning telegramm messendjerida Surxondaryo viloyati Boysun tumanidagi “Enter engineering Pte Ltd” qo`shma korxonasi bir guruh xodimlarining 2021 yil aprel oyi uchun ish haqlari to`lab berilmaganligi haqida xabar tarqaldi. Mehnat vazirligi ushbu xabarlarga izoh berdi.
Surxondaryo viloyati Bandlik bosh boshqarmasi davlat mehnat inspeksiyasi tomonidan aniqlanishicha, “Enter engineering Pte Ltd” qo`shma korxonasida 1 100 nafar xodim faoliyat ko`rsatib, ayni paytda ularga aprel oyi uchun ish haqqi to`lanmagan.
Tuzilgan mehnat shartnomasiga ko`ra, korxona ishchilariga ishbay — ya`ni, bajargan ish hajmiga asosan ish haqqi berilishi belgilangan bo`lib, 2021 yil aprel oyi uchun bajarilgan ish hajmi 2021 yilning 15 may sanasida topshirilganligi sababli o`z vaqtida maosh to`lash kechikkan.
Mazkur holat yuzasidan mehnat inspeksiyasi korxona rahbariyatiga xodimlarning ish haqlari joriy yilning 1 iyun sanasiga qadar to`liq to`lab berilishi bo`yicha bajarilishi majburiy bo`lgan yozma ko`rsatma kiritdi.
