Andijon shahrida 24 may kuni erkak tanishi tomonidan pichoqlangani haqida xabarlar tarqaldi. Ichki ishlar vazirligi mazkur xabarlarga izoh berdi.
Xabarga ko`ra, 24 may kuni soat taxminan 19:30 larda fuqaro I.I. Andijon shahar Bunyodkor mahallasida joylashgan xonadonlarning birida o`ziga oldindan tanish bo`lgan O.A. bilan o`zaro janjallashgan va uning bel va tomoq qismiga o`tkir tig`li jism bilan zarba bergan.
Sud-tibbiy ekspertizasining dastlabki ma`lumotnomasiga ko`ra, «chap bel sohasida 1,5 santimetr kirgan, bo`yin dahanosti sohasida o`tkir jism bilan etkazilgan sanchilgan kesilgan jarohati, badanida qontalash va shilinmalar» kabi sog`liqni uzoq muddatga buzilishiga olib kelgan «o`rtacha og`ir» tan jarohati etkazgan.
Mazkur holat yuzasidan I.I.ga nisbatan Andijon shahar Ichki ishlar organlari faoliyatini muvofiqlashtirish boshqarmasi huzuridagi Tergov bo`limi tomonidan Jinoyat kodeksining 105-moddasi 2-qismi «m» bandi bilan jinoyat ishi qo`zg`atilib, tergov harakatlari olib borilmoqda. Jinoyat ishi bo`yicha gumonlanuvchiga ayblov e`lon qilingan va qamoqqa olish tarzidagi ehtiyot chorasi qo`llanilgan.
