Prezident Yangihayot tumanidagi farmasevtika korxonasida bo`ldi

Davlatimiz rahbari poytaxtimizning Yangihayot tumanidagi «Dentafill Plyus» mas`uliyati cheklangan jamiyati faoliyati bilan tanishdi. Bu haqda Prezident Matbuot xizmati xabar bermoqda. 

Bu korxona 2019 yilda ishga tushirilgan. Shveysariya, Germaniya, Turkiya, Xitoy, Yaponiya, Malayziya va Janubiy Koreyadan eng zamonaviy uskunalar keltirib o`rnatilgan. Bugun bu erda 20 dan ortiq farmakologik guruhga mansub 172 dan ziyod dori vositasi va tibbiyot buyumlari ishlab chiqarilmoqda. Yillik quvvat 60 million dona. 

Prezident korxona ishlab chiqarilgan dori vositalarini ko`zdan kechirdi.

- Farmasevtika bo`yicha katta imkoniyatlarimiz bo`la turib, bundan foydalanilmas edi. Hozirgacha katta xarajatlar evaziga chetdan dori-darmon olib kelinyapti. Shuning uchun biz zaminni mustahkam qilayapmiz. Avvalo, kadrlar tayyorlash, innovasiyalarni joriy qilish, ilmni rivojlantirishga e`tibor qaratyapmiz. Endi ishlab chiqarish ham sifatli bo`ladi, - dedi davlatimiz rahbari.

Bu korxonaga Farmasevtika instituti talabalarini jalb etib, nazariyani amaliyot bilan mutanosib olib borish zarurligi ta`kidlandi. 

Korxonada Evropaning etakchi kompaniyalari, O`zbekiston Fanlar akademiyasining O`simlik moddalari kimyosi instituti va Polimerlar kimyosi va fizikasi instituti bilan muvaffaqiyatli hamkorlik yo`lga qo`yilgan. Bu mahsulotlarning turini ko`paytirish va sifatini ta`minlashga xizmat qilmoqda. 

Mas`uliyati cheklangan jamiyatda mahalliylashtirish darajasi 65 foizga etgan. Shveysariyaning BFS texnologiyasi asosida in`eksion preparatlarni polimer ampulalarda ishlab chiqarish imkoniyati yaratildi. Lateks xomashyosidan jarrohlik qo`lqoplarini ishlab chiqarish texnologiyasi ham o`zlashtirildi. Korxonada 360 kishi ish bilan ta`minlangan.

Yiliga 25 million dona dori vositalari Kuvayt, Rossiya, Belarus, Gruziya, Qozog`iston, Tojikiston, Qirg`iziston, Afg`oniston kabi davlatlarga eksport qilinmoqda. 

Hozir dunyoda tabiiy giyohlardan tayyorlangan dorilarga talab ortmoqda. Korxonada yurtimizda o`sadigan dorivor o`simliklarni ekstraksiya qilish, ulardan turli mahsulotlar ishlab chiqarish ustida ham izlanishlar olib borilmoqda.

Prezidentimizga Toshkent viloyatining Zangiota tumanida “Tashkent Pharma Park” innovasion farmasevtika klasteri qurilishining borishi haqida ham ma`lumot berildi.

Shuningdek, davlatimiz rahbari jurnalistlar bilan muloqot qildi.