“O`zbekneftgaz” AJ Matbuot xizmati xabar berganidek, O`zbekiston Respublikasi Prezidenti Shavkat Mirziyoevning Rossiya Federasiyasiga 2017 yil 4-5 aprel kunlari amalga oshirgan davlat tashrifi davomida “O`zbekneftgaz” AJ va “Gazprom” AJ o`rtasida “Kadrlar tayyorlash va qayta tayyorlash sohasidagi hamkorlik to`g`risida” memorandum imzolangan edi.
“O`zbekneftgaz” AJ Boshqaruvi raisi Mehriddin Abdullaevning topshirig`iga muvofiq, mazkur memorandum ijrosini ta`minlash hamda neft-gaz sanoati korxonalarida mehnat qilayotgan xodimlarning malakasi va bilimlarini oshirish maqsadida “Gazprom korporativ instituti” tomonidan o`quv kurslari tashkil etildi.
Bu safargi o`quv kurslari “Uglevodorod xomashyolarini qayta ishlashda zamonaviy texnologiyalar” va “Quduq kesimlarini o`rganishning geofizik metodlari va neft-gaz kollektorlarining parametrlarini aniqlash” dasturlari bo`yicha onlayn tarzda tashkil etilgan bo`lib, unda sohaning 40 nafar xodimlari ishtirok etishdi.
Eslatib o`tamiz, iyun oyi boshida “Neft-gaz kompleksida loyihalarni boshqarish” va “KPI va HR-menejment boshqaruv tizimi” dasturlari bo`yicha malaka oshirish kurslari tashkil etilgan edi.
