Kecha, 29-iyun kuni Turkiya Respublikasi vise-prezidenti Fuat Oktay Samarqand shahridagi “Ipak yo`li” xalqaro turizm universitetiga tashrif buyurdi. Yuqori martabali mehmonga Ozbekiston Respublikasi Bosh vazir o`rinbosari – Turizm va sport vaziri Aziz Abduhakimov hamda Bosh vazir o`rinbosari – Investisiya va tashqi savdo vaziri Sardor Umrzoqov hamrohlik qildi. Bu haqda Turizm va sport vazirligi Axborot xizmati xabar berdi.
Fuat Oktayning yurtimizga tashrifidan maqsad - O`zbekiston-Turkiya munosabatlarini nafaqat ta`lim sohasida, balki turizm yo`nalishida ham rivojlantirish uchun “Ipak yo`li” xalqaro turizm universiteti faoliyati bilan tanishish.
“Universitet jamoasining aksariyati yosh va kuch-quvvatga to`la insonlar, talabalar esa shijoatli ekanini ko`rib turibman. Bular - O`zbekiston turizmining kelajagi”, - dedi Turkiya vise-prezidenti.
“Ipak yo`li” xalqaro turizm universiteti rektori Aziz Abduhakimov mehmonlarni universitet faoliyati bilan tanishtirdi.
Samarqanddagi xalqaro turizm universitetida o`tgan tadbir ishtirokchilari Turkiyaning turizmni rivojlantirishdagi boy tajribasi O`zbekistonning sayyohlik salohiyatini rivojlantirishda ijobiy rol o`ynashini ta`kidlashdi. Shuningdek, ikki mamlakat o`rtasida madaniyat, ilm-fan, ta`lim, sog`liqni saqlash va sport sohalarida hamkorlikni rivojlantirish bo`yicha qo`shma tadbirlar o`tkazish muhimligi qayd etildi.
Uchrashuvda qator dolzarb masalalar muhokama qilindi - “Ipak yo`li” xalqaro turizm universiteti qoshida “Turk mamlakatlari madaniyati va merosi maktabi” va “Tarixiy merosni restavrasiya qilish maktabi”ni tashkil etish, sohani rivojlantirishda ilmiy tadqiqotlarning o`rni: turkiy tilshunoslik, san`at, etno-madaniy tadbirlar, nomoddiy madaniy merosni qayta tiklash shular jumlasidandir.
Shu bilan birga, O`zbekiston va Turkiya mamlakatlari pedagog hamda talabalari o`rtasida akademik almashinuv hamda “Madaniyat”, “Din”, “Turizm” yo`nalishlari bo`yicha ikki tomonlama diplom dasturlarini yo`lga qo`yishga kelishib olindi.
Ta`kidlash joizki, Turkiya vise-prezidenti Fuat Oktayning O`zbekistonga tashrifi doirasida savdo-iqtisodiy hamkorlik bo`yicha hukumatlararo komissiyaning VI yig`ilishi hamda ikki mamlakat ishbilarmon doiralari o`rtasida to`g`ridan-to`g`ri aloqalarni rag`batlantirish va sanoat koperasiyasining yangi loyihalarini shakllantirishga qaratilgan biznes-forum bo`lib o`tdi.
Tashrif yakuniga ko`ra, Turkiya vise-prezidenti F.Oktay “Ipak yo`li” xalqaro turizm universitetining tilaklar kitobida iliq so`zlarni yozib qoldirdi va oliygoh talabalarini Turkiyaga taklif qildi.
Mavzuga doir:
