2021 yil 29 iyun kuni “Markaziy Osiyo mintaqasida COVID-19dan keyin tiklanishga barqaror yondashuvlar: parlamentlarning roli” mavzusida onlayn konferensiya bo`lib o`tdi.
Parlamentlararo Ittifoq va BMTning Atrof-muhit dasturi tomonidan tashkil etilgan onlayn konferensiyada O`zbekiston, Qozog`iston, Qirg`iziston, Tojikiston va Turkmaniston parlamentlari senatorlari, deputatlari hamda OAV vakillari ishtirok etdi.
Tadbirni O`zbekiston Respublikasi Oliy Majlisi Qonunchilik palatasi Spikerining birinchi o`rinbosari, Parlamentlararo Ittifoq vise-prezidenti Akmal Saidov kirish nutqi bilan ochib berdi.
A. Saidov, avvalambor, barchaga ma`lum sabablarga ko`ra, ushbu anjuman onlayn o`tkazilayotganini qayd etdi. Binobarin, 2019 yil dekabr oyidan buyon butun dunyoda odamlar, tovarlar, global moliyaviy harakatlar cheklanmoqda. Ba`zi mamlakatlarda vaksinasiyalash amalga oshirilgan bo`lsa-da, vaziyat qachon odatiy holatga kelishi mumkinligini hech kim ayta olmaydi.
COVID-19 butun dunyoni tahlikaga solib turgan bo`lishiga qaramay, uning tabiat bilan uyg`unlashib ketishiga, yaqin istiqbolda kelajak avlod bahramand bo`ladigan barqaror yashash normalarini shakllantirishga erishishimiz lozim.Shu bilan birga, koronavirus pandemiyasi tufayli dunyoda biron- bir davlat jahon iqtisodiyotidan ajralgan holda rivojlana olmasligini yana bir bor his qildik. Xususan, mazkur vebinar Markaziy Osiyo mintaqasi mamlakatlari o`rtasidagi parlamentlararo hamkorlikni chuqur tahlil qilish maydoni sifatida xizmat qilishi muqarrar.
Shuningdek, vebinarda qayd etilganidek, bugungi kunga qadar O`zbekiston atrof-muhitni muhofaza qilish sohasidagi o`n bitta xalqaro konvensiya, bitim va ular doirasidagi ettita ko`p tomonlama xalqaro shartnomaga qo`shilgan. Jumladan, Parij bitimini ratifikasiya qilgan tomon sifatida 2030 yilga kelib issiqxona gazlari solishtirma tashlanmalarini 2010 yildagi darajaga nisbatan 10 foiz qisqartirish bo`yicha majburiyat olgan.
Shundan kelib chiqib, Davlat dasturining tegishli bandiga muvofiq, O`zbekistonning Parij bitimiga qo`shilishi munosabati bilan “yashil iqtisodiyot”ga o`tish bo`yicha davlat strategiyasi ishlab chiqildi. Mamlakatimizda bu yo`nalishda ekologik sof, resurstejamkor texnologiyalarni joriy etish bo`yicha qator loyihalar amalga oshirilmoqda.
Jumladan, so`nggi yillarda Orolbo`yi hududida bir nechta loyiha bajarildi. Buning natijasida Orol dengizining qurib qolgan hududida saksovul va cho`lga chidamli boshqa o`simliklar ekildi. Mo`ynoq shahri infratuzilmasi tubdan yaxshilandi.
Do`stona ruhda o`tgan onlayn konferensiyada parlamentlararo muloqotlar mintaqadagi mamlakatlarni yuksak taraqqiyot yo`liga olib chiqish, xalqning iqtisodiy ahvolini yaxshilash va echimini kutayotgan masalalarni o`zaro tajriba va fikr almashish orqali hal qilishga xizmat qilishi ta`kidlandi.
Muloqot yakunida ko`p tomonlama aloqalarni rivojlantirishda muhim omil bo`lgan parlamentlararo hamkorlikni yanada kengaytirish va mustahkamlash, bu borada hamkorlikdagi tadbirlarni tashkil etish, qonun ijodkorligi bo`yicha tajriba almashishga kelishib olindi.
Inson huquqlari bo`yicha O`zbekiston Respublikasi
Milliy markazining matbuot xizmati
