“O`zbekneftgaz” AJ Boshqaruvi raisi Mehriddin Abdullaev boshchiligidagi “Ishchi guruh” a`zolari Muborak neft va gaz qazib chiqarish boshqarmasidagi konlarda olib borilayotgan ishlar va konda ishlayotgan ishchi-xodimlarning yashash sharoitlari bilan yaqindan tanishishdi. Bu haqda “O`zbekneftgaz” AJ Matbuot xizmati ma`lum qildi.
“Zevarda” konidagi yangi qurilgan siquv kompressor stansiyasida bosh pudratchi “Enter Engineering” kompaniyasi rahbariyati bilan uchrashib, yangi qurilayotgan siquv kompressor stansiyalaridagi mavjud muammolarni bartaraf qilish bo`yicha muzokara olib bordi va sodir bo`layotgan to`xtalishlar oldini olish choralari ko`rildi.
Shuningdek, Muborak neft va gaz qazib chiqarish boshqarmasiga qarashli “Dengizko`l” konidagi yangi qurilayotgan siquv kompressor stansiyasining 2-navbatidagi olib borilayotgan qurilish ishlari bilan tanishildi.
Buxoro viloyatining Olot tumanida joylashgan “Dengizko`l” konidagi qurilayotgan 2-navbat siquv kompressor stansiyasi past bosimli gazlarni o`zlashtirishga mo`ljallangan.
“O`zbekneftgaz” AJ Boshqaruvi raisi ushbu loyiha bilan va uning imkoniyatlari va afzal jihatlari hamda kelgusida ushbu qurilma orqali amalga oshirilishi ko`zda tutilgan rejalar bilan yaqindan tanishib chiqdi.
Ushbu loyiha O`zbekiston Respublikasi Prezidentining “2017–2021 yillarda uglevodorod xomashyosini qazib olishni ko`paytirish Dasturini tasdiqlash to`g`risida”gi qarorida belgilangan vazifalarning ijrosini o`z vaqtida va samarali amalga oshirish maqsadida “O`zbekneftgaz” AJ va Natural Gaz-Stream, Eriell Oilfield Services Middle East DMCC kompaniyalari xamkorligida amalga oshirilmoqda.
“Dengizko`l” konidagi 39,3 mlrd kub metr hajmdagi joriy tabiiy gaz zaxiralarini samarali qazib olishni jadallashtirish maqsadida, “Dengizko`l” siquv kompressor stansiyasining umumiy qiymati 87,8 mln dollarga teng bo`lgan ushbu loyiha bosh pudratchi “Enter Engineering” kompaniyasi tomonidan qurib bitkaziladi.
Loyihani jadal suratlarda amalga oshirish uchun eng ilg`or va zamonaviy dastgohlar, gaz-turbina uskunalari hamda kompressorlarni etkazib berish bo`yicha Turkiyaning “Akcelik”, AQShning “Baker Hughes” va “General Electric” hamda Xitoyning “Denair Energy” kabi bir qator yirik kompaniyalar bilan samarali hamkorlik amalga oshirilmoqda.
Ushbu siquv kompressor stansiyasining 2-navbati 2 ta agregat orqali “Dengizko`l” koni quduqlarining sanoat miqyosidagi past bosimli tabiiy gazlari bosimini ko`tarib “Dengizko`l” siquv kompressor stansiyasiga uzatib berish va bu orqali tabiiy gaz qazib chiqarish hajmlarini oshirishga xizmat qiladi.
“Dengizko`l” kon zaxiralarini o`zlashtirishni jadallashtirish maqsadida 2021 yilda qo`shimcha geologik-texnik tadbirlarni amalga oshirish, ya`ni 7 ta yangi ishlatish quduqlarini burg`ilab ishga tushirish va 32 ta quduqda kapital tamirlash ishlarini amalga oshirish orqali qo`shimcha 102,5 mln kub metr tabiiy gaz va 0,8 ming tonna gaz kondensati mahsulotlarini qazib olish mo`ljallangan.
Shu bilan birgalikda Boshqaruv raisi yangi qazilayotgan “Zevarda” 324-son, qiya yunaltirilgan “Dengizko`l” 324-son, to`la ta`mirlanayotgan “Dengizko`l” 105-son va “Shimoliy Dengizko`l” 12-son quduqlariga borib, ularda olib borilayotgan ishlar bilan yaqindan tanishdi hamda ishlarni jadallashtirish bo`yicha tegishli mutaxassislarga ko`rsatmalar berdi.
