Avval xabar qilganimizdek, ayni paytda O`zbekistonda anomal issiq havo kuzatilmoqda. "O`zgidromet" 6-8 iyul kunlari harorat me`yordan 8 darajagacha yuqori bo`lishi haqida xabar berdi.
O`zbekiston hukumati iyul oyining birinchi yarmida mamlakatga issiq havo oqimi kirib kelishi oqibatida hududlarda ob-havo harorati o`ta keskin ko`tarilishi kutilayotgani munosabati bilan shoshilinch choralar ko`rishga kirishdi. Bu haqda "Gazeta.uz" xabar qildi.
Topshiriq prezident administrasiyasi rahbari Z.Nizomiddinov tomonidan imzolangan va bosh vazir A.Aripov va uning o`rinbosarlari, viloyatlar hokimlari, vazirliklar, idoralar, xo`jalik birlashmalari rahbarlariga yo`llangan. Unga ko`ra, favqulodda vaziyatda aholi salomatligini himoya qilish, havo harorati keskin ko`tarilishi oqibatida yuzaga keladigan noxush holatlarning oldini olish maqsadida shoshilinch tarzda tegishli chora-tadbirlar amalga oshirilishi zarurligi ko`rsatilgan.
Xususan:
Shuningdek, daryo va ko`llar, aholi dam olish maskanlarida xavfsizlik masalalarini kuchaytirish, buning uchun Favqulodda vaziyatlar vazirligi kuchlarini to`liq safarbar etish zarur.
Topshiriqda bolalar lagerlari, dam olish oromgohlari va sihatgohlarda keskin issiq ob-havodan himoyalanish va xavfsizlik choralarini kuchaytirish, bunda kun tatibiga qat`iy rioya qilish, ochiq osmon ostidagi mashg`ulotlarni cheklash, bolalarga kun davomida jismoniy yuklamani imkon qadar kamaytirish va toza ichimlik suvi bilan ta`minlash, oromgohlarda sanitariya-gigiena qoidalari va me`yorlariga qat`iy amal qilish ustidan nazoratni kuchaytirish zarurligi ta`kidlangan.
Topshiriqqa muvofiq, energetika tarmoqlari, jumladan elektr energiyasi va tabiiy gaz ta`minoti tizimlarining barqaror ishlashini ta`minlash zarur.
Barcha darajadagi energetika va kommunal xizmat ko`rsatish tashkilotlarida tun-u kun navbatchilikni yo`lga qo`yish, avariya holatlari oldini olish va tezkor bartaraf etish choralarini ko`rish kerak.
Shuningdek, qishloq xo`jaligida ko`p yillik tajribaga ega bo`lgan soha mutaxassislari, dehqonlar va olimlarni jalb qilib, ekinlarni va yaratilgan hosilni saqlab qolish choralarini ko`rish topshiriq qilingan.
Qolaversa, noodatiy issiq havo natijasida kuchli yomg`ir yog`ishi ehtimolini inobatga olib, joylarda sel toshqinlari xavfining oldini olish choralarini ko`rish, tog` va tog` oldi hududlardagi yorib chiqishi mumkin bo`lgan yuqori tog` ko`llari bo`yicha sel yo`llari holatini nazoratga olish bo`yicha ko`rsatmalar berilgan.