Ijtimoiy tarmoqda "Dislokasiya va guvohnomam "Tracker"da qolib ketdi" sarlavhasi ostidagi videolavha tarqaldi.
Ichki ishlar vazirligi Yo`l harakati xavfsizligi Bosh boshqarmasining ma`lum qilishicha, joriy yilning 19 iyul kuni soat 16:00 larda Toshkent viloyati hududidan o`tgan 4P-12 avtomobil yo`lida xizmat olib borayotgan viloyat IIBB YHXB YPX xodimi A.Pirdavlatov tomonidan "Spark" rusumli avtomobil to`xtatilgan.
Tekshiruv davomida 2000 yilda tug`ilgan haydovchi hali haydovchilik guvohnomasi olmaganligi ma`lum bo`lgan va YPX xodimi tomonidan ma`muriy bayonnoma tuzilib, avtomobil vaqtincha saqlash uchun jarima maydoniga olib borilgan.
Jarima maydonida yo`lovchilardan biri YPX xodimidan dislokasiya ko`chirmasini va xizmat guvohnomasini ko`rsatishini talab qilgan. YPX xodimi mazkur hujjatlari "Spark" avtomobili to`xtatilgan joyda, "Tracker" rusumli maxsus xizmat avtomobilida qolganligini, borib ko`rsatishi mumkinligini ma`lum qilgan. Shuningdek, o`zaro muloqot vaqtida YPX xodimi fuqaroga "sen" - deya murojaat qilganligi aks etgan.
Hozirda holat yuzasidan Toshkent viloyati IIBB YHXB tomonidan surishtiruv harakatlari olib borilayotgani aytilmoqda.
