Kuni kecha Tokio-2020 yozgi Olimpiya o`yinlarida ishtirok etgan O`zbekiston delegasiyasi Toshkentga etib kelgani haqida yozgan edik.
Oliy Majlis Senati Raisi Tanzila Norboeva sportchilarni Olimpiyadada erishgan yutuqlari bilan tabrikladi:
Hurmatli olimpiada ishtirokchilari!
Men barcha sportchilarni, murabbiylarni, Tokiodagi XXXII yozgi Olimpiya o`yinlarida hamyurtlarimizni munosib o`yin ko`rsatishga harakat qilgan barchalarni ushbu g`alabalar bilan tabriklayman!
Umumjamoa hisobida O`zbekiston 3 ta oltin va 2 ta bronza medalini qo`lga kiritib, Markaziy Osiyo mintaqasi davlatlari orasida peshqadam, shuningdek, turkiyzabon va islom davlatlari orasida etakchi o`rinni egalladi. Biz MDH davlatlari orasida munosib ikkinchi o`rinni egallab, Osiyo mamlakatlari orasida ham beshinchi o`rinni egalladik. 2020 yilgi Olimpiya o`yinlarida ishtirok etgan davlatlar orasida 32 - o`rinni egallashga muvaffaq bo`ldik. Bu ulkan natija!
Olimpiadachilarimizning ismlari, ularning g`alabalari va rekordlari jahon sporti yilnomasiga oltin harflar bilan yozilgan. Taekvondochi Ulug`bek Rashitov, og`ir atletikachi Akbar Jo`raev va bokschi Bahodir Jalolovning uzoq kutilgan oltin medallarni qo`lga kiritgan yutuqlarini alohida qayd etmoqchiman. Dzyudochi Davlat Bobonov va kurashchi Bekzod Abdurahmonov jamoani bronza medali bilan to`ldirishdi.
Ayniqsa, qizlarimizning ham rekord natijalarni qayd etganligi meni juda xursand qildi. Muattar Nabieva butun dunyo va O`zbekiston tarixiga birinchi og`ir atletikachi ayol sifatida Olimpiya rekordini o`rnatdi va Olimpiya o`yinlarida kuchli to`rtlikka kirdi.
Gimnastikachi Oksana Chusovitina sakkizinchi olimpiadasida qatnashib, o`z rekordini yangiladi. Velosipedchi Olga Zabelinskayani ham alohida ta`kidlash lozim, u O`zbekiston velosporti tarixida Olimpiya o`yinlarida mamlakat sharafini himoya qilgan birinchi ayol bo`ldi. Natijada u kuchli o`nlikka kirib Osiyo mamlakatlari vakillari orasida birinchi bo`ldi.
Bu sportchilarga qarab, bugun har biringiz o`zingizga ishonib, o`z oldingizga aniq maqsad qo`yib, unga erishish uchun ishonch hosil qilish imkoniyatiga ega ekanligingizni tushunish mumkin!
Hurmatli olimpiyachilar! Bugun siz hammamiz faxrlanadigan haqiqiy qahramonlarsiz. Sizlarga sihat-salomatlik, kuch-quvvat va barcha harakatlaringizda maksimal natijalarga erishishingizni tilayman!
Biz esa har doim sizni turli arena va sport maydonlaridan olqishlab, qo`llab-quvvatlaymiz!
