Toshkent shahar IIBB va DXX xodimlari bilan hamkorlikda Uchtepa tumanida o`tkazilgan profilaktik tadbirlar davomida Karimbaeva Arofat, Rixsibaeva Xadicha, Raupova Lobarlar maxsus diniy ma`lumoti bo`lmay turib va diniy tashkilot boshqaruvi markaziy organining ruxsatisiz ayollar va qizlarga diniy ta`limdan saboq berib kelganligi aniqlangan. Bu haqda Toshkent shahar IIBB xabar bermoqda.
Mazkur holat yuzasidan ushbu shaxslarga nisbatan O`zbekiston Respublikasi Mamuriy javobgarlik to`g`risidagi kodeksining 241-moddasiga (“Diniy ta`limotdan saboq berish tartibini buzish”) muvofiq hujjatlar rasmiylashtirilib, sudga oshirildi.
Sud tomonidan ularning har biriga nisbatan BHMning 5 barobari miqdorida jarima jazosi tayinlandi.
"Hurmatli fuqarolar! Unutmang, diniy ta`limotdan saboq berish tartibini buzish qonunchiligimizda taqiqlanadi. Agarda shaxs ma`muriy javobgarlikka tortilganidan so`ng yana shu kabi noqonuniy faoliyat bilan shug`ullansa, O`zbekiston Respublikasi Jinoyat kodeksining 229-2-moddasiga asosan (“Diniy ta`limotdan saboq berish tartibini buzish”) jinoiy javobgarlikka tortilishi mumkin",–deyiladi shahar IIBB axborotida.
