Ijtimoiy tarmoqlarda “GAI akalarimizdan alkotesterni innovasiyasi” sarlavhasi ostida video tarqaldi. Unda YPX xodimi haydovchiga alkotester o`rniga elim idish bergani aks etgan. Ushbu holat sabab ijtimoiy tarmoq foydalanuvchilari tomonidan YPX xodimlarida “Alkotester” vositalaridan foydalanilmayotganligi ko`plab e`tirozlarga va munozaralarga sabab bo`lgan.
Holat yuzasidan IIV YHXBB Axborot xizmati munosabat bildirdi.
Aniqlanishicha, joriy yilning 10 sentyabr kuni Jizzax shahri hududida tungi xizmatga jalb etilgan YPX inspektorlari tomonidan mast holda transport vositasi boshqarayotgan haydovchilarni aniqlash borasida reyd tadbirlari o`tkazilayotgan vaqtda Jizzax shahar, Kimyogar mahallasi, Sayilgoh ko`chasida 5 nafar YPX xodimlari tomonidan “Kobalt” rusumli transport vositasi to`xtatilgan va haydovchining spirtli ichimlik iste`mol qilgan yoki qilmaganligini aniqlash maqsadida YPX inspektori safdor A.Shodmonqulov tomonidan bir marotaba ishlatiladigan qog`ozdan tayyorlangan stakan ko`rsatilgan.
Mazkur holat yuzasidan xodimlar tomonidan alkotester vositasidan foydalanmaganligi uchun barcha xodimlarga nisbatan keskin choralar ko`riladi.
Ma`lumot o`rnida, bugungi kunda Jizzax viloyati IIB YHXB 7 dona “Meta” rusumli va 6 dona “Alko Stop 8000S” rusumli alkotester vositalari bilan ta`minlangan.
Holat yuzasidan Jizzax viloyati IIB YHXB ma`sul xodimlari tomonidan xizmat tekshiruvi o`tkazilmoqda.
