IIBB Axborot xizmatining ma`lum qilishicha, joriy yilning 21-sentyabr kuni O`rta Chirchiq tumani “Tuyabo`g`iz” MFYda yashovchi 1976-yilda tug`ilgan, fuqaro S.Axmedov Toshkent viloyati IIBBga ariza bilan murojaat qiladi.
Unda 2012 yilda vafot etgan qarindoshining uyini tozalayotgan vaqtida buyumlar orasidan 1960-yilda ishlab chiqarilgan 2 dona “Toz-BUM” rusumli, 16 kalibrli, 2 stvolli ov qurollarini matoga o`ralgan holda topib olganini va qurolga tegishli hech qanday hujjatlarni topilmagani uchun o`z ixtiyori bilan IIOga topshirishini ma`lum qilgan.
Ushbu qurollar shu kunning o`zida tuman IIB xodimlari tomonidan tegishli tartibda rasmiylashtirilib olinadi.
IIBB qurol, o`q-dorilar, portlovchi moddalar yoki portlatish qurilmalariga qonunga xilof ravishda egalik qilish – BHMning 50 baravarigacha miqdorda jarimadan tortib, to 20 yilgacha ozodlikdan mahrum qilish bilan jazolanishga sabab bo`lishini eslatmoqda.
