Xabaringiz bor, Oliy Majlisning Inson huquqlari bo`yicha vakili (ombudsman) mutaxassislari tomonidan belgilangan jadval asosida har dushanba – juma kunlari soat 10:00 dan 13:00 gacha va 15:00 dan 17:00 gacha fuqarolar qabuli o`tkazilmoqda.
Joriy yilning 30 sentyabr kuni ham Oliy Majlisning Inson huquqlari bo`yicha vakili (ombudsman) Feruza Eshmatovaning navbatdagi fuqarolar qabulini o`tkazdi.
100 nafarga yaqin fuqaro ishtirok etgan qabul davomida sud-huquq, uy-joy, bandlik, ijtimoiy yordam, aliment, kredit va boshqa masalalar yuzasidan murojaatlar kelib tushib, nazoratga olingan. Ba`zi murojaatlar bo`yicha fuqarolarga tegishli huquqiy maslahat va tushuntirishlar berilgan. Bu haqda Ombudsman axborot xizmati ma`lum qildi.
Qayd etilishicha, qabul davomida namanganlik murojaatchi, uch yil davomida turmush o`rtog`i va kelini tomonidan bosim o`tkazilgani, janjal chiqarib yosh bolasi bilan uydan haydalgani va hozirda yashashga joyi bo`lmagani uchun vokzallarda tunab qolayotganini bildirgan.
Ombudsman darhol Mahalla va oilani qo`llab-quvvatlash vazirligi huzuridagi Ayollarni reabilitasiya qilish va moslashtirish respublika markazi bilan bog`lanib, ushbu fuqaroni markazga joylashtirilishida yordam bergan.
Farg`ona viloyatidan Ombudsman qabuliga kelgan murojaatchi so`lariga ko`ra esa birinchi guruh nogironi bo`lib, u shu kunga qadar 19 marotaba ko`z jarrohlik amaliyotini boshdan o`tkazgan. Oliy ta`lim muassasasiga o`qishga kirib, oliy ma`lumotli bo`lish istagida bo`lgan ushbu murojaatchi Toshkent davlat yuridik universitetiga o`qishga kirishga ballari etmaganini qayd etib, Ombudsmandan nogironligi bo`lgan shaxslar uchun OTMga kirish imtiyozlaridan foydalanishda amaliy yordam berishini so`ragan.
Unga ko`ra, 2020 yilning 15 oktyabr kuni Davlat rahbari tomonidan imzolangan yangi tahrirdagi "Nogironligi bo`lgan shaxslarning huquqlari to`g`risida"gi Qonun bilan imkoniyati cheklanganlarning ijtimoiy himoyasi bilan bog`liq qator masalalar Qonun darajasida belgilangan.
Jumladan, nogironligi bo`lgan bolalarning bepul umumiy o`rta, maktabdan tashqari, o`rta maxsus va professional ta`lim olishini kafolatlash, bunda imkoniyati cheklangan shaxslar uchun oliy ta`lim muassasalarida davlat granti asosida abiturientlarni qabul qilish umumiy sonining 2 foizi miqdorida qo`shimcha qabul kvotasi ajratilishi belgilangan.
Yuqoridagilardan kelib chiqib, murojaat nazoratga olinib, nogironligi bo`lgan murojaatchini oliy ta`lim bilan qamrab olinishi bo`yicha qonun doirasida O`zbekiston Respublikasi Adliya vazirligiga tegishli takliflar kiritilishi belgilab olingan.
"Qabul davomida nafaqat murojaatlar balki qonunchilikni takomillashtirish, jinoyatchilikni oldini olish choralarini kuchaytirish borasida takliflar ham bildirildi",–deyiladi xabarda.
