Davlat ekologiya qo`mitasi «Navoiyazot» korxonasi qudug`idan sanoat chiqindilarining Zarafshon daryosiga tashlanganligini aniqladi. Xavfli moddalarning ruxsat etilgan konsentrasiyasi bir necha bor oshib ketishi baliqlarning ommaviy zaharlanishiga olib keldi.
«Navoiyazot» AJga qarashli 267-quduqdan (1-tashlama) daryoga hayot uchun xavfli moddalar chiqarilgan, deya xabar berdi Davlat ekologiya qo`mitasi matbuot xizmati.
Xabarga aytilishicha, Navoiy viloyati Ekologiya va atrof-muhitni muhofaza qilish boshqarmasi inspektorlari tomonidan Zarafshon daryosining Karmana tumanidan oqib o`tuvchi qismining 5 ta nuqtasidan tahlil namunalari olib, tegishlicha o`rganilgan. Natijada daryoga chiqarilgan moddalar belgilangan me`yorlardan bir necha barobarga yuqoriligi aniqlangan. Xususan:
- azot ammoniy 21 barobar;
- azot nitrat 2,6 barobar;
- azot nitrit 60 barobar;
- xloridlar 1,3 barobar;
- mis ionlari 2,1 barobar.
Ma`lum bo`lishicha, sanab o`tilgan moddalarning belgilangan me`yordan oshirilishi tufayli daryoda yoppasiga zaharlanish yuzaga kelganligi aniqlangan.
Hozirda mazkur holat bo`yicha dastlabki surishtiruv ishlari davom etmoqda. Ishning yakuni bo`yicha qo`shimcha ma`lumot berilishi va bu ma`lumotlar huquqni muhofaza qilish organlariga taqdim etilishi aytilgan.
