Avval xabar berilganidek, joriy yilning 11 noyabridan 21 noyabr kuniga qadar, Bangladesh Respublikasining Dakka shahrida Kamondan otish sport turi bo`yicha Osiyo chempionati musobaqasi bo`lib o`tdi.
Musobaqada Osiyoning 16 davlatidan saralangan sportchilar g`oliblik uchun o`zaro kuch sinashdi.
Chempionatning ilk kunida hamyurtimiz Sodiqov Amirxon merganlik mahoratini namoyish etib, xalqaro toifadagi sport ustasi me`yorini bajarib, 656 ball to`plagani quvonarlidir. Ta`kidlash joizki, bugungi kunda mamlakatimizda 6 nafar sportchimiz xalqaro toifadagi sport ustasi unvoniga ega.
Shuningdek, terma jamoamiz, Olimpiya turlari, erkaklar va ayollar o`rtasida jamoaviy bellashuv hamda miks turlarida (aralash jamoalar) ham ajoyib natijalarga erishdi. Qizg`in va murosasiz kechgan bellashuvlarda sportchilarimiz umumjamoa hisobida 16 ta davlat orasida faxrli 4-o`rinni qo`lga kiritdi.
