Buxoro viloyatida 20 dekabr kuni Milliy gvardiya xodimi xizmat vaqtida mashina urib ketishi oqibatida vafot etdi. Bu haqda Zamon.uz nashri xabar berdi.
Ma`lum qilinishicha, Milliy gvardiya Qo`riqlash boshqarmasi safdor xodimlari H.A. va N.O. o`ziga biriktirilgan hududda xizmatga jalb qilingan. Ular 20 dekabr soat 05:15 atrofida Gazli Neft va gaz qazib chiqarish boshqarmasiga qarashli "Qumli GTK mobil" yo`nalishinng 34—42-kilometridagi yo`nalishni qo`riqlash uchun "Niva" avtomobilida qo`riqlanadigan hududga boradi.
Xodimlar xizmat vaqtida yo`nalish quvurining taqiqlangan qismidan "UAZ"avtomashinasi harakatlanib kelayotganini ko`rgan va unga to`xtash ishorasini ko`rsatgan. Biroq haydovchi xodimlarning qonuniy talablariga bo`ysunmay harakatlanishda davom etgan va Milliy gvardiya safdorini avtomashinaning old qismi bilan qasddan urib yuborgan.
Qonunbuzar fuqaro qochib ketgan, xodim esa og`ir tan jarohati olib, voqea joyida halok bo`lgan.
Holat yuzasidan qasddan jinoyat sodir etgan fuqaroga nisbatan Jinoyat kodeksining 97-moddasi 2-qismi "g" (xizmat yoki fuqarolik burchini bajarishi munosabati bilan shaxsni qasddan o`ldirish) bandi bilan jinoyat ishi qo`zg`atilib, gumon qilinuvchiga nisbatan qamoqqa olish tarzidagi ehtiyot chorasi qo`llanilgan.