Turkiyaning TRT telekanali prodyuseri, ziyorat turizmi bo`yicha mashhur bloger Serdar Tunjer boshchiligidagi targ`ibot guruhi tomonidan “Oltin silsila halqasi bo`ylab" ko`rsatuvi suratga olinmoqda. Bu haqda Turizm va sport vazirligi Matbuot xizmati xabar qildi.
Bu borada Turizm va sport vazirligi ziyorat turizmi departamenti, Turizm va sport yo`nalishi mutasaddilari hamda soha mutaxassislari ishtirokida O`zbekistonga tashrif buyurgan mazkur guruh bilan uchrashuv tashkil etildi.
Tadbirda prodyuser Serdar Tunjer o`zining 10 kunlik dasturini Surxondaryo viloyatidagi Alauddin Attor ziyoratgohidan boshlab, keyinchalik Samarqand viloyatida Imom al-Buxoriy, Imom al-Moturidiy, Xo`ja Ahrori Valiy, Buxorodagi Said Amir Kulol, Bahouddin Naqshband majmualaridan onlayn translyasiyalarni shaxsiy YouTube kanali orqali davom ettirayotganligi haqida ma`lum qildi.
"Ushbu loyihamizni o`tgan yilning oxirida Tojikistondagi Yoqub Charxiy ziyoratgohidan boshlab, bugunga qadar mamlakatingizning ko`plab ziyorat maskanlarida bo`ldik. O`zbekiston haqida gapirar ekanman, bu erda ham sayohat ham ziyorat qilish uchun barcha imkoniyatlar mavjud. Dunyoning eng go`zal maskanlarida joningiz rohatlanishi mumkin, biroq ruhingiz orom olishi uchun birgina Buxoroga tashrif buyursangiz bo`lgani",-dedi Serdar Tunjer o`z intervyusida.
Bundan asosiy maqsad “Oltin silsila halqasi”dagi muborak zotlar ziyoratgohlarining turistik salohiyati, ularning ilmiy merosi, jahon tamaddunida tutgan beqiyos o`rni to`g`risida Turkiya telekanallarida targ`ib qilishdan iborat. Xususan, bu borada xorijiy mamlakatlardan ziyoratchilarni jalb etish va mazkur yo`nalish rivojlantirish doirasida o`zaro hamkorlikni yanada kengaytirish zarurligini alohida ta`kidlandi.
Shuningdek, O`zbekiston vakillari tomonidan ham qator loyihalar, xususan, turkiyalik imomlarni Buxoroga taklif qilish orqali ziyorat turizmi targ`ibotini kuchaytirish, Samarqand haqida video materiallar tayyorlash hamda Surxondaryo, Qashqadaryo viloyatlari va Toshkent shahri haqidagi qiziqarli videomateriallar orqali ziyoratchi sayyohlar oqimini ko`paytirish kabi masalalar muhokama qilindi.
Yaqin kunlarda Turkiyalik teleprodyuser tomonidan tayyorlangan mazkur yirik shaharlardagi ziyoratgohlar haqidagi turkum ko`rsatuvlar ramazon oyida Turkiyaning TRT telekanali orqali dunyoning 128 davlatiga namoyish etilishi rejalashtirilgan.
Eslatib o`tamiz, avvlroq, O`zbekistonda ziyorat turizmini rivojlantirish borasida samarali hamkorlik qilib kelayotgan Serdar Tunjer Buxoro viloyatining Turkiyadagi “Turizm elchisi” etib tayinlangani xabar qilingan.
