Samarqand shahrida Turkiy davlatlar tashkiloti turizm sohasi vakillaridan iborat ishchi guruhining XVI yig`ilishi bo`lib o`tdi. Bu haqda Turizm va sport vazirligi matbuot xizmati xabar bermoqda.
Tadbirda O`zbekiston, Turkiya, Ozarbayjon, Qozog`iston, Qirg`iziston kabi davlatlarning turizm va sport vazirliklari vakillari ishtirok etishdi. Onlayn formatda Vengriya sayyohlik agentligi rahbari hamda Turkmaniston hukumatining turizm sohasi mutaxassislari qatnashdi.
Yig`ilishda ishchi guruh “Tabarruk ziyorat” konsepsiyasi asosida hamkorlikni rivojlantirish, tashkilot tarixida birinchi marta “Turkiy dunyo turizm poytaxti” deb e`tirof etilgan Qo`qon shahrining turizm salohiyatini birgalikda targ`ib qilish masalalarini muhokama qildi. Bu haqda 2021 yil 24 iyun kuni Qo`qon shahrida bo`lib o`tgan Turkiy davlatlar tashkilotiga a`zo davlatlar turizm vazirlari va kuzatuvchilarning 6-yig`ilishida so`z yuritilgan edi. Bundan tashqari, 2021 yil 12 noyabr kuni Istanbul shahrida bo`lib o`tgan Turkiy davlatlar tashkilotiga a`zo davlatlar rahbarlari va kuzatuvchilari yig`ilishida ham qator tashabbuslar ilgari surildi.
O`zbekiston tomonidan “Tabarruk ziyorat” loyihasi doirasida “yo`l xaritasi”ni ishlab chiqishni, shuningdek, Qo`qon shahrining turkiy dunyo turistik poytaxt maqomi asosida hunarmandlarning qo`shma ko`rgazmalari, etnosport musobaqalari, shuningdek, madaniy merosni asrab-avaylash va ta`mirlash tadbirlarini tashkil etishni rejalashtirilgan. “Yo`l xaritasi” tashkilotga a`zo bo`lgan barcha mamlakatlar uchun amal qiladi hamda turizmni rivojlantirish bo`yicha asosiy aloqa nuqtalarini belgilab beradi.
“Tabarruk ziyorat” loyihasi doirasida tashkilotga a`zo davlatlar va kuzatuvchi davlatlar o`rtasida turizm sohasidagi hamkorlikni yanada chuqurlashtirish ko`zda tutilgan. Ishchi guruh xalqaro yarmarkalar, ko`rgazmalar, festivallar, milliy sport musobaqalarini birgalikda o`tkazish, O`zbekistondagi xalqaro ilmiy markazlar bilan tashkilotga a`zo davlatlardagi ilmiy markazlar o`rtasidagi aloqalarni mustahkamlash masalalarini muhokama qildi.
Yig`ilishda Turkiya Respublikasi Madaniyat va turizm vazirligi Investisiyalar va rejalashtirish boshqarmasi boshlig`i Mustafo O`zdemir, Evropa Ittifoqi va xalqaro aloqalar boshqarmasi boshlig`i vazifasini bajaruvchi Gezde Shahin, , madaniyat va turizm bo`yicha mutaxassis Aybike Deliedan iborat Turkiya delegasiyasi loyihani amalga oshirish hamda turkiy davlatlar tashkiloti doirasidagi hamkorlik bo`yicha takliflar bildirgan. Shuningdek, turizmning turli yo`nalishlari bo`yicha kadrlar tayyorlash, qayta tayyorlash va tajriba almashish sohasida hamkorlik qilishga tayyor ekanliklarini qayd etishdi.
Qozog`istondan Turkiston viloyati hokimi o`rinbosari Rashid Ayupov, turizm boshqarmasi boshlig`i Gulmira Axberdieva, investisiya va eksport boshqarmasi boshlig`i o`rinbosari Nurgul Abdurazzoqova, “Turkistan Tourism Center” turistik axborot markazi direktori Oljas Shintaev ishtirok etishdi. Rashid Ayupov ishchi guruh a`zolarini Qozog`istonning turizm salohiyati, jumladan, Turkiston viloyatining turkiy dunyoda tutgan o`rni bilan tanishtirdi.
Tashrif doirasida mehmonlar buyuk mutafakkir Alisher Navoiy tavalludining 581 yilligi xotirasiga bag`ishlab, turkiy til taraqqiyotiga ulkan hissa qo`shgan ulug` arbob ilmiy faoliyat olib borgan Mirzo Ulug`bek madrasasi, shuningdek, Hazrati Imom Moturidiy maqbarasi kabi shaharning sayyohlik maskanlarida bo`lishdi.
Tadbirda Qo`qon shahrining “Turkiy dunyo turizm poytaxti” deb e`lon qilinishi munosabati bilan tashkil etiladigan 2022 yilga mo`ljallangan chora-tadbirlar rejasi ham muhokama qilindi.
