Bugun, 15 fevral kuni Buxoro viloyati Korrupsiyaga qarshi kurashish hududiy Kengashining yig`ilishi bo`lib o`tdi.
Buxoro viloyatida korrupsiyaga qarshi kurashishning samarali tizimini joriy etish, xususan, sog`liqni saqlash sohasida korrupsiyaning oldini olishga borasida amalga oshirilgan ishlarni muhokama qilish hamda istiqboldagi vazifalarni belgilashga bag`ishlangan yig`ilishda Korrupsiyaga qarshi kurashish agentligi rahbariyati, Oliy Majlis Senati Sud-huquq masalalari va korrupsiyaga qarshi kurashish qo`mitasi, Korrupsiyaga qarshi kurashish bo`yicha viloyat hududiy kengashi a`zolari, sektor rahbarlari, xalq deputatlari viloyat Kengashi deputatlari, davlat va xo`jalik boshqaruvi organlarining boshqarma boshliqlari, korrupsiyaga qarshi ichki nazorat tuzilmasi xodimlari va ommaviy axborot vositalari vakillari ishtirok etdi.
Tanqidiy ruhda kechgan yig`ilishni viloyat hokimi Botir Zaripov kirish so`zi bilan ochdi va boshqarib bordi.
Yig`ilishda sog`liqni saqlash tizimini korrupsiyadan holi sohaga aylantirish, korrupsiyaviy holatlarga barham berish, tizimga ochiqlik va shaffoflik prinsiplarini joriy qilish maqsadida bir qator normativ-huquqiy hujjatlar qabul qilingan bo`lsada, tizimda korrupsiyaga qarshi kurash bo`yicha amaliy ishlar talab darajasida emasligi, sohadagi ayrim rahbarlar bu illatdan haliyam xalos bo`lmagani alohida ta`kidlandi.
Yig`ilishda O`zbekiston Respublikasi Korrupsiyaga qarshi kurashish agentligi direktori Akmal Burxanov, Oliy Majlis Senatining Sud-huquq masalalari va korrupsiyaga qarshi kurashish qo`mitasi raisi Narimon Umarovlar so`zga chiqib, birgina 2021 yil davomida viloyat tibbiyot muassasalarida ishga olish bilan bog`iq 14 ta jinoyat sodir qilingani, bu davrda sog`liqni saqlash xodimlari tomonidan sodir etilgan jinoyatlarning qariyb 40 foizini poraxo`rlik jinoyatlari tashkil qilganligi tashvishli hol ekanligi, so`nggi ikki yilda bo`sh ish o`rinlarini yashirish bilan bog`liq 33 marotaba qonunbuzilish holati aniqlanib, aybdor mansabdor shaxslar ma`muriy javobgarlikka tortilgani yoki axborot–kommunikasiya yutuqlaridan foydalanib, inson omilini cheklagan holda tibbiyot muassasalarida shaffof ishga olish tizimi tashkil etilmagani, umuman, sog`liqni saqlash tizimida “korrupsiyasiz soha” loyihasini izchil joriy etish holati to`g`risida to`xtalib, sohada korrupsiya holatlari hamda ularni keltirib chiqarayotgan shart-sharoitlarni muhokama qildilar.
Yig`ilishda sog`liqni saqlash tizimida korrupsiyaning oldini olish bo`yicha amalga oshirilgan ishlar, tizimda uchrayotgan korrupsiyaviy jinoyatlar tahlili yuzasidan viloyat prokurori Mahmud Istamovning axboroti tinglandi. Qayd qilinganidek, sohada aksariyat sodir etilgan jinoyatlar xodimlarni ishga olish, vakansiyalarni berkitish, shtat birliklarini noto`g`ri taqsimlash kabi holatlar bilan bog`liqdir.
Xususan, viloyatda sog`liqni saqlash tizimida so`nggi 2 yilda bo`sh ish o`rinlarini yashirish bilan bog`liq 33 ta qonun buzilish holatlari aniqlanib, aybdor mansabdor shaxslarning ma`muriy javobgarlik masalasi hal etilgan. Qolaversa, axborot kommunikasiya yutuqlaridan foydalanib, inson omilini cheklagan holda tibbiyot muassasalarida shaffof ishga olish tizimi tashkil etilmagan.
Yig`ilishda tizimda sog`liqni saqlash boshqarmasi boshlig`i Askar Bahronovning ham hisoboti eshitildi.
Eshituv so`nggida shu kabi bir qator jiddiy nuqson va kamchiliklar tanqid qilinib, kelgusida ularni bartaraf etishga qaratilgan chora-tadbirlar belgilab olindi. Jumladan, sog`liqni saqlash tizimi ustidan jamoatchilik nazoratini kuchaytirish, bu borada viloyat korrupsiyaga qarshi kurashish kengashi faolligini yanada oshirish zarurligi qayd etildi. Shuningdek, ishga qabul qilish va lavozimga tayinlash va boshqa masalalarda inson omilini kamaytirish, qarorlar qabul qilinishida qonuniylikka rioya etish va barcha jarayonlar ustidan prokuror nazoratini kuchaytirish singari masalalar ham amalga oshirilishi lozim bo`lgan muhim vazifalar qatoridan joy oldi.
Yig`ilishda Oliy Majlis Senati a`zosi Abira Huseynova, Buxoro davlat universiteti rektori Obidjon Hamidovlar sog`liqni saqlash tizimini har qanday illat va jinoyatdan xoli sohaga aylantirish chora-tadbirlari bo`yicha takliflarini bildirishdi.
Bundan tashqari, shu kabi tahliliy, tanqidiy yig`ilishlarni, rahbarlar eshituvini davlat xaridlari, qurilish, davlat xizmatiga ishga olish, er ajratish, maktabgacha ta`lim va boshqa sohalarda ham muntazam ravishda tashkil etib borish, davlat xizmatchilari uchun ushbu yo`nalishda tizimli maxsus seminarlar, o`quv dasturlar tashkil etish bo`yicha tegishli qaror qabul qilindi.
Shundan so`ng Agentlik ishchi guruhi a`zolari sog`liqni saqlash tizimida “Korrupsiyasiz soha” loyihasining ijrosini o`rganish maqsadida bir qator tibbiyot muassasalarida bo`lishdi. Xususan, Buxoro viloyati Bolalar ko`p tarmoqli tibbiyot markazida korrupsiya holatlarini oldini olish bo`yicha ko`rilgan choralar, muassasaning videokuzatuv moslamalari, targ`ibot vositalari bilan ta`minlanganligi, pullik xizmat ko`rsatish tartibi, dori-darmonlar bilan ta`minlanganlik holati kabi masalalar o`rganildi va tibbiyot muassasalarida korrupsiyani oldini olish bo`yicha amalga oshirilishi lozim bo`lgan vazifalar belgilab berildi.
