Ijtimoiy tarmoqlarda bir fuqaro va ichki ishlar organlari xodimlari o`rtasi shovqin ko`tarayotganligi aks etgan video tarqalmoqda. Ushbu videoga sharhda esa, Toshkent shahar hokimi qabuliga kelgan fuqaroni qabulga qo`yishmayotganligi aytilgan.
Mazkur holat yuzasidan Toshkent shahar IIBBning ma`lum qilishicha, joriy yilning 10 aprel kuni taxminan soat 19.00 larda Chilonzor tumanidagi “Dilobod” mahallasida 1996 yilda tug`ilgan T.G. bir nechta fuqarolar bilan og`zaki janjallashib jamoat tartibini buzgan.
So`ng voqea joyiga etib kelgan ichki ishlar organlari xodimlarining jamoat tartibini saqlash haqidagi qonuniy talabini bajarmasdan, ommani o`ziga qaratish maqsadida baqir-chaqir qilib, IIO xodimlaridan qochishga harakat qilgan.
Ushbu fuqaroga nisbatan O`zbekiston Respublikasi Ma`muriy javobgarlik to`g`risidagi kodeksining 183-moddasi (“Mayda bezorilik”) hamda 194-moddasi (“Ichki ishlar organlari xodimining qonuniy talablarini bajarmaslik”) alomatlari bilan ma`muriy bayonnoma rasmiylashtirilib, o`rnatilgan tartibda ko`rib chiqishlik uchun sudga taqdim etilgan.
