Yulduz Usmonova shaxsiy klinika ochishdagi sarsongarchiliklar haqida gapirdi.
«Men ilgari ashulamni aytib yuraverar ekanman. Biznesmenlarni faqat boy odam deb bilar ekanmiz. Bechora biznesmenlarning qancha muammosi borligini o`zi bilar ekan, xolos. Hokimlik-ku, yakka o`zi qaror qabul qilishga qo`rqadi. Tumanga ariza bersangiz, shaharga jo`natadi, undan keyin boshqasiga yuboradi, xullas, hammasi asabbuzarlik. Hokimlikdagilar klinika ochishga ruxsat berguniga qadar bir yildan ortiqroq vaqt o`tdi.
Undan keyin bank burnimizdan ip o`tkazib sudrashdi. Yulduz Usmonova va Mansur Agaliev necha yildan beri soliq to`laydi. Nahotki, shu vaqtgacha ishonchga kirmagan bo`lsak, deb xafa bo`ldim. Masalan, bu yilgi konsertning o`zidan 600 million so`m soliq to`ladik. Nafaqat «Xalqlar do`stligi» boshqa erlardagi konsertlar uchun ham soliq to`laymiz.
Bank xodimlaridan qattiq ranjidim. Men-ku mayli, boshqa yoshlar ham biznes g`oyasi bilan bankka borsa, shunday bo`laveradimi? Kreditni ham 22 foizdan berishdi, bu kichkina mablag` emas. Yulduz Usmonova bo`lib shuncha qiyinchilik bilan kredit olsam bu ketishda biz hech qachon o`smaymiz.
Bank boshqaruvchilari 2-3 yilda o`zgarib tursa ham burni osmon-u, falakda ekan. Ularda muomala yo`q. Endi shularni ko`rmay, deb o`tiribman.
Bunaqada o`sish bo`lmaydi. Yoshlarga yo`l beringlar. Uyini tikib, mashinasini tikib ish boshlayman deyotganlarga imkon berish kerak-ku. Imkon berilsa, yana Alisher Usmonovlar paydo bo`ladi", - deya Usmonova intervyusidan iqtibos keltiryapti "Zamon" nashri.
