«Taraqqiyot strategiyasi» markazi hamda Axborot texnologiyalari va kommunikasiyalarini rivojlantirish vazirligi bilan birgalikda "Inson qadri" onlayn portal ishlab chiqilgan. Bu haqda “Inson qadri” onlayn platformasi hamda “2022–2026 yillarga mo`ljallangan Yangi O`zbekistonning taraqqiyot strategiyasi” to`plami taqdimotlariga bag`ishlangan xalqaro tadbirda xabar berildi.
Endilikda aholi «davlatdasturi.uz» onlayn platformasi orqali Davlat dasturlarida belgilangan chora-tadbirlarning ijrosi bilan batafsil tanishishlari, shuningdek, tegishli yo`nalish va unda amalga oshirilishi belgilangan ishlar ijrosi yuzasidan o`z fikr, taklif va e`tirozlarini bildirishlari ham mumkin bo`ladi.
Taraqqiyot strategiyasi va Davlat dasturining ijrosi to`g`risidagi ma`lumotlarni keng jamoatchilik tomonidan kuzatib borish imkonini yaratish maqsadida portal ma`lumotlari muntazam yangilanib boriladi.
Shu bilan birga, platformada Davlat dasturining har bir bandining ijro holatini ko`rsatib o`tish imkoniyati yaratilgan. Mazkur imkoniyatlar tegishli davlat organlarining Davlat dasturining ijrosi bo`yicha mas`uliyati va hisobdorligini oshiradi.
Eng muhimi, portalda amalga oshirilgan islohotlarni o`z hayotida his qilishi kerak bo`lgan fuqarolarda ijro holati bo`yicha o`z munosabatlarini foto, video yoki elektron hujjatlarni yuklash orqali ham jo`natish imkoniyati yaratilgan.