BMT Xavfsizlik kengashida “Gro Intelligence” tahliliy kompaniyasi bosh direktori Sara Menker dunyoda 10 haftaga etarli bug`doy qolganini ma`lum qildi. Bu haqda Zamon.uz xabar bermoqda.
Uning so`zlariga ko`ra, jahon bozoriga bug`doyning uchdan bir qismini etkazib beradigan Rossiya va Ukraina o`rtasidagi urush “uzoq vaqtdan beri yonayotgan olovga faqat yog` qo`shgan”. Bu orada yana bir yirik ta`minotchi Hindiston ham bug`doy eksportini taqiqladi.
“Koronavirus pandemiyasidan ancha oldin biz duch kelgan inqiroz ta`minot zanjirlarimizning nozikligini ochib berdi. Buni hammangiz tushunishingiz uchun aytamanki, agar mojaro ertaga yakunlansa ham, bizning oziq-ovqat xavfsizligi muammomiz yaqin orada yo`q bo`lmaydi”,— degan u.
Asosiy ekinlar narxining oshishi joriy yilda dunyo bo`ylab yana 400 million odamni ochlik xavf ostida qoldirdi. BMT ma`lumotlariga ko`ra, Rossiyaning Ukrainaga keng ko`lamli bostirib kirishi tufayli qariyb 1,7 milliard odam qashshoqlik va ochlikka mahkum bo`ladi.
