Bugungi kunda o`zbek adabiyotining taniqli vakillari asarlari nafaqat yurtimizda, balki dunyo xalqlari orasida ham o`z o`quvchilarini topib, xorijiy davlatlarda ham ovoza bo`lmoqda.
Iste`dodli shoira Xosiyat Rustamovaning kitoblari hozirgacha dunyoning 17 mamlakatida nashr etildi. Shoira bir qancha nufuzli xalqaro adabiy tanlovlar g`olibi, she`rlari ko`plab tillarga tarjima qilinib, chet el bosma va elektron nashrlarda ham muntazam chop etilmoqda. Yurtimiz adabiy va madaniy hayotini jahon uzra keng targ`ib qilayotgan taniqli shoira ijodi va faoliyatiga bag`ishlangan "Xosiyat" deb nomlangan badiiy hujjatli film suratga olindi.
O`zbekiston Respublikasi Kinematografiya agentligi "RAMSEL-FILM" kinostudiyasi hamda Ozarbayjon Milliy Majlisi madaniyat masalalari qo`mitasi, Haydar Aliev nomidagi Toshkentdagi Madaniyat markazi hamkorligida olingan ushbu film premerasi bo`lib o`tdi. Toshkentdagi Ozarbayjon madaniyat markazida namoyish qilindi. O`zbekiston va Ozarbayjon Yozuvchilar uyushmasi a`zosi, “ Kitob dunyosi” gazetasi Bosh muharriri Xosiyat Rustamova tug`ilib o`sgan Namangan viloyati, Chust tumanidagi Olmos qishlog`i, yurtimizning go`zal manzaralariga uyg`un lirik tasvirlar filmga o`zgacha go`zallik baxsh etgan. Shoiraning adabiy jarayondagi bugungi faoliyati bilan bog`liq tasvirlar tomoshabinlarda qiziqish uyg`otadi.
Film ssenariysini O`zbekiston yozuvchilar uyushmasi a`zosi, taniqli adib Shoyim Bo`taev hamda Ozarbayjon Milliy Majlisi madaniyat masalalari qo`mitasi raisi, shoira Ganira Pashaeva yozgan. Film rejissyori Eldar Mamedov hamda Elnura Kasimova.
