Prezident Shavkat Mirziyoev Bolalar gematologiyasi, onkologiyasi va klinik immunologiyasi markaziga tashrif buyurganida, u erda davolanayotgan bolalardan davlat rahbariga yo`llangan maktublarni olgan edi.
"Hammasini o`qib, albatta javob beraman", degan edi Prezident.
Bugun, "Yoshlar kuni"da 6 oydan buyon markazda davolanayotgan va qisqa muddatga uyiga qaytgan 8 yoshli g`uzorlik Arslonbek Jo`raevga ham Prezidentdan xat keldi. Davlat rahbarining dil so`zlari bitilgan maktubni viloyat hokimi Arslonbekni oila a`zolariga o`qib eshittirdi. Prezident nomidan estalik sovg`alari, kitoblar to`plami, turli o`yinchoqlar va 10 million so`m hamda qo`shimcha dori-darmonlar taqdim etildi. Bu haqda hokimlik xabar bermoqda.
"Prezidentimizning maktubidan keyin huddi-ki, Arslonjonim to`liq davo topgandek, men esa yosharib ketgandek, quvonchdan yig`lab yubordim. Yurt otasi o`z farzandidek, "Arslonjon o`g`lim", deya nabiramga xat yo`llagani bizni 6 oy davomidagi azoblarimizni tarqatib yubordi",-deydi bolakayning momosi.
Arslonjon Prezident bilan uchrashuvda shifokor bo`lishini, dunyoda bemor bolalar qolmasligi eng katta orzusi ekanini va o`zini davolayotgan shifokorlardek Vatanga xizmat qilishini aytgandi. Bugun jajji Arslonbek shifokorlar kiyimida Prezident tabrigini qabul qilib oldi.
Eslatib o`tamiz, sal avval xovoslik Odinaxonga ham Prezidentdan maktub kelgani xabar qilingan edi.
