8 avgust... O`zbekistonda yoshlar bandligini ta`minlashga qaratilgan maxsus qurultoy uchun mamlkat yoshlari sekin-asta Shahrisabzda jamlanishni boshladi..
Bugun esa uzoq intiqib kutilgan mazkur "Yoshlar turizmi" qurultoyiga start berildi.
Ayni damda bo`lib o`tayotgan tadbirning rasmiy ochilish marosimida Turizm va madaniy meros vaziri Aziz Abduhakimovning xabar berishicha, iyul oyida o`tkazilgan Yoshlar turizm oyligida 200 mingga yaqin yoshlarning ichki turizm sayohatlari tashkil etildi.
"Qadim Shahrisabzning “Lochin” oromgohida 4 kun davomida kitobxonlik, mahorat darslari, milliy va etnosport turlari bo`yicha sport musobaqalari, madaniy ko`ngilochar tadbirlar, gala-konsert va boshqa tadbirlar mamlakatimizning turli hududlaridan kelgan yoshlarning do`stona muhitda yashab, yangi loyihalar ustida fikr almashishi yo`lida xizmat qiladi",-deydi Abduhakimov so`zi avvalida yoshlarga ularni ko`rib turganidan mamnun ekanini bildirib.
"O`ylaymanki, bugungi Qurultoy iqtidorli yoshlarni saralash, ularning turizmni rivojlantirishga oid loyihalarini qo`llab-quvvatlash orqali malakali mutaxassislarni tayyorlash, yoshlar bandligini ta`minlashga asos bo`lib xizmat qiladi",-deydi vazir.
Ma`lum qilinishicha, tadbir doirasida yoshlar tomonidan taqdim qilingan eng yaxshi turizm loyihalariga Turizm va madaniy meros vazirligi tomonidan birinchi o`ringa - 30 mln. so`m, ikkinchi o`ringa - 20 mln. so`m, uchinchi o`ringa esa 10 mln. so`m, jami - 60 mln. so`mlik mukofot mablag`larlari ajratilgan.
Bundan tashqari, 30 yoshgacha bo`lgan yoshlarning turoperatorlik faoliyatini qo`llab-quvvatlash maqsadida 50 mln. so`mlik grant mablag`lari ham shular jumlasidan.
Oybek Shukurov.