Bugun, 12 avgust kuni Prezident Shavkat Mirziyoev Bekobod shahriga tashrif buyurdi.
Davlatimiz rahbari dastlab metallurgiya tarmog`ining ishlab chiqarish quvvatlarida olib borilayotgan ishlarni ko`zdan kechirdi. Ayni paytda metallurgiya sohasi vakillari va tadbirkorlar bilan uchrashuv o`tkazmoqda.
–Bugun metallurglar shahri – Bekobodda amalga oshirilayotgan yirik loyihalarning borishi bilan tanishish hamda metallurgiya sohasi istiqbollarini sizlar bilan birga belgilab olish uchun keldim. O`tgan asrning qirqinchi yillarida ishga tushgan O`zbekiston metallurgiya kombinati uzoq yillar mamlakatimizda qora metallurgiya sohasida yagona yirik korxona bo`lib kelgan edi. So`nggi besh yildagi islohotlarimiz natijasida 200 ta yangi korxona tashkil etildi va o`tgan yilning o`zida sohada 16 trillion so`mlik mahsulotlar ishlab chiqarildi (2017 yilda 4 trillion so`m bo`lgan),– dedi davlatimiz rahbari. – Ushbu korxonalarda 25 mingdan ziyod aholimiz mehnat qilmoqda. Sohada temir va temir mahsulotlari ishlab chiqarish 1,8 barobar o`sib, 2 million tonnadan ko`paydi. Kelgusida esa, birgina hozir borib ko`rgan Quyuv prokat majmuasida yiliga yana 1 million tonna po`lat listlari ishlab chiqariladi. Mazkur loyiha ishga tushgach, kombinat quvvatlari 2 baravarga oshadi. Ya`ni, ko`z oldimizda, mamlakatimizning yuqori texnologiyalarga asoslangan yangi tarmog`i – zamonaviy qora metallurgiya sanoati bunyod etilmoqda.
