Joriy yilning 15-16 sentyabr kunlari Samarqand shahrida o`tadigan Shanxay Hamkorlik Tashkilotiga a`zo davlatlar rahbarlarining sammiti oldidan mintaqaning sport oilasi o`rtasidagi do`stlik aloqalari yanada mustahkamlanmoqda.
Samarqanddagi sammit oldidan ilk bor yo`lga qo`yilgan “Shanxay Hamkorlik Tashkilotining sport elchilari” loyihasi buning uchun ajoyib platforma vazifasini bajarib berdi. Bu haqda Sportni rivojlantirish vazirligi xabar berdi.
Yodingizda bo`lsa, 19-21 may kunlari Toshkent shahri ilk bor tashkil etilgan ShHTga a`zo mamlakatlar vakillarining jismoniy tarbiya va sport bo`yicha vazirlik hamda idoralari rahbarlari ishtirokidagi yig`ilishiga mezbonlik qilgandi. Mazkur yig`ilish doirasida o`tgan uchrashuvlar mintaqada jismoniy tarbiya va sport rivoji yo`lida tinchlik va do`stlik rishtalarini yanada mustahkamlovchi vosita bo`ldi.
Toshkentda o`tkazilayotgan “Shanxay Hamkorlik Tashkilotining sport elchilari” loyihasi ham o`zining ijobiy samarasini berdi. Ushbu tadbir avvalida kecha, 9 sentyabr kuni “International Hotel Tashkent” mehmonxonasida matbuot anjumani bo`lib o`tdi. Sportni rivojlantirish vazirligi va MOQ mutasaddilari, shuningdek, mintaqaning taniqli 7 nafar sportchisi spikerligida o`tgan anjuman mamlakatlarning sport sohasida qanchalik do`stona aloqada ekanini ko`rsatib berdi.
Kecha loyihaning ikkinchi qismi doirasida o`zbek va jahon sporti yulduzlari ishtirokida mahorat saboqlari hamda fleshmob tashkil etildi.
Fleshmob doirasidagi ommaviy marosimda dastavval “O`zbekistonga xush kelibsiz” nomi ostida maxsus rolik namoyish etildi. Tabiiyki, bu orqali yurtimiz mehmonlari davlatimiz, uning sport sohasidagi yutuqlari haqidagi bilimlarini yanada boyitib olishdi.
So`ngra tadbirning rasmiy ochilish marosimi o`tkazildi. Unda O`zbekiston Respublikasi Sportni rivojlantirish vaziri Adham Ikramov, Osiyo Olimpiya Kengashi vise-prezidenti Otabek Umarov, shuningdek mamlakatimizdagi xorijiy diplomatik korpuslarning mas`ul xodimlari, jumladan janob Prabhat Manish (Hindiston), Leonid Marinich (Belarus) va boshqalar, vazirlik hamda Milliy Olimpiya qo`mitasi mutasaddilari ishtirok etishdi.
Shundan so`ng o`zbek jang san`ati, taekvondo, turon jang san`ati, karate, gimnastika, u-shu kabi sport turlaridan ko`rgazmali chiqishlar namoyish etildi.
Unda so`zga chiqqan Sportni rivojlantirish vaziri A.Ikramov ushbu tadbirning ahamiyati va uning mamlakatlar o`rtasida sport aloqalarini mustahkamlashdagi o`rniga alohida to`xtalib o`tdi.
“Shanxay Hamkorlik Tashkilotining sport elchilari” sifatida poytaxtimizga mintaqaning quyidagi mashhur sportchilar tashrif buyurishdi:
Abdulrashid Sadulaev (Rossiya) – erkin kurash bo`yicha ikki karra (Rio-2016 va Tokio-2020) Olimpiya o`yinlari chempioni, 5 karra jahon chempioni;
Ahmed Gadjimagomedov (Rossiya) – Erkin kurash bo`yicha jahon chempionati sovrindori;
Musa Evloev (Rossiya) – yunon-rum kurashi bo`yicha Tokio-2020 Olimpiadasi chempioni;
Kamshibek Konkabaev (Qozog`iston) – boks bo`yicha Tokio-2020 Olimpiya o`yinlari sovrindori, 2 karra jahon chempionati kumush medal sohibi;
Saken Bibosinov (Qozog`iston) – boks bo`yicha Tokio-2020 Olimpiadasi sovrindori;
Muhammad Nuh (Pokiston) – og`ir atletika bo`yicha Birmingem-2022 Hamdo`stlik o`yinlari g`olibi;
Shoira Zulqaynarova (Tojikiston) – boks bo`yicha 2 karra Osiyo chempionati sovrindori;
Xushqadam Xusravov (Tojikiston) – sambo bo`yicha jahon chempioni;
Ramazon Qodirbekov (Qirg`iziston) – o`q otish bo`yicha ko`plab xalqaro turnirlar g`olibi va sovrindori.
Shuningdek, ular qatorida Bahodir Jalolov, Oksana Chusovitina, Ruslan Nurudinov, Akbar Jo`raev, Ulug`bek Rashitov, Isroil Madrimov kabi o`zbek sportining yorqin yulduzlari ham tadbirda hozir bo`lishdi.
Shubhasiz, bunday ko`tarinki ruhda tashkil etilgan ommaviy sport bayrami mamlakatimizda Prezidentimiz ilgari surayotgan sog`lom turmush tarzi targ`iboti va yoshlarda sportga bo`lgan qiziqishni kuchaytirishda muhim ahamiyat kasb etadi.
