Avval xabar qilganimizdek, O`zbekistonda "Ipak yo`li durdonasi” XIV Toshkent xalqaro kinofestivali dasturi doirasida mamlakatimizda “Shanxay hamkorlik tashkiloti kino kunlari” o`tkazilmoqda.
13 sentyabr kuni Alisher Navoiy nomidagi Davlat akademik katta teatrida “Tojikiston Respublikasi kinosi kunlari”ning ochilish marosimi bo`lib o`tdi. Tadbirda ikki davlat kinoijodkorlari, Tojik milliy madaniyat markazi xodimlari, kino muxlislari ishtirok etdi.
Tadbirda so`zga chiqqan O`zbekiston Respublikasi Kinematografiya agentligi bosh direktorining birinchi o`rinbosari Shuhrat Rizaev, taniqli kinorejissyor Ali Hamroev, “Tojikfilm” davlat muassasasi direktori Mahmasaid Shohiyon, Tojikiston kinoijodkorlar uyushmasi raisi Safar Haqdodov va boshqalar o`zbek va tojik kinoijodkorlari uzoq yillardan beri hamkorlik qilib kelishi, ayni paytda hamkorlikda kino kunlari o`tkazilayotgani, filmlar suratga olinayotganini aytib o`tishdi.
-O`zbek va tojik kinosini bemalol egizak deb atash mumkin, - deydi Shuhrat Rizaev. – Chunki, Komil Yormatov, Boris Kimyogarov singari taniqli kino darg`alari har ikki mamlakat kinematografiyasiga munosib hissa qo`shishgan. Yodgor Sa`diev, Isamat Ergashev, To`g`on Rejametov singari o`zbek aktyorlari ko`plab tojik filmlarida suratga tutishgan. Sayram Isaeva, Ato Muhammadjonov, Tohir Sobirov singari tojik san`atkorlari o`zbekistonlik kinoijodkorlar yaratgan filmlarda esda qolarli rollar ijro etishgan. Bugungi kunda ham bu an`ana davom etmoqda.
-Ayni paytda O`zbekistonda tojik, Tojikistonda o`zbek kinosi kunlarini o`tkazish yaxshi an`anaga aylangan, - deydi Mahmasaid Shohiyon. - Keyingi yillarda o`zbek hamkasblarimiz yaratgan “Ilhaq”, “101-reys” filmlarini tomoshabinlarimiz iliq kutib olishdi. Ayni paytda biz ham so`nggi paytlarda yaratilgan bir qator filmlarimizni o`zbek do`stlarimizga namoyish etmoqchimiz. Tez kunlarda birgalikda “Jomiy va Navoiy”, “Ko`rinmas yulduz” qo`shma filmlarini suratga olishni boshlaymiz.
Shundan so`ng tomoshabinlarga “Tojikfilm” DM tomonidan suratga olingan “Yo`l” badiiy filmi (rejisser: Nosir Saidov) namoyish qilindi. Filmda bugungi kundagi global o`zgarishlar va milliy qadriyatlar o`rtasidagi mutanosibliklar, insoniy munosabatlar va qarama-qarshiliklar ifoda etilgan.
Tojikiston kinosi kunlari doirasida “Ovchining so`nggi ovi”, “Farishtalarning ukasi”, “ShHTning ikki yili: muvaffaqiyat sari” singari badiiy va hujjatli filmlar ham namoyish qilinadi.