Bugun XIV Toshkent xalqaro kinofestivali doirasida “O`zbek kino kunlari”ga bag`ishlangan tadbir bo`lib o`tdi.
Unda O`zbekiston Kinematografiya agentligi hamda Hindistonning “Kartina entertainment” studiyasi o`rtasida hamkorlikda «Yulduz» («Star») filmini suratga olish bo`yicha xalqaro memorandum imzolandi.
“Bugun biz uchun juda muhim kun. Nihoyat O`zbekiston bilan qo`shma film yaratish bo`yicha memorandum imzoladik. Bu myuzikl drama bo`lib, sevgi-muhabbat haqida bo`ladi. Asosiy maqsad ikki mamlakat san`ati va me`morchiligi tarixini o`zaro bog`lashdir. Xususan, milliy musiqa janrlari ham tarannum etiladi. Filmda ishtirok etish uchun biz Bollivudning “Zita va Gita” filmidagi roli bilan tanilgan afsonaviy Hema Malini, «Bobbi» filmining bosh qahramoni Dimpl Kapadya kabi ikkala mashhur aktyorni ham taklif qildik. Shuningdek, “Disko raqqosasi” filmining bosh qahramoni Mithun Chakraborti va boshqa yosh aktyorlar bilan muzokaralar olib boryapmiz. Yurtingizda ekanligimdan juda xursandman. Hozir Buxoroda s`yomka jarayonlarini amalga oshirishni mo`ljallab turibmiz. Ishonchim komilki, O`zbekiston bilan yana ko`plab loyihalarimiz bor”, — dedi hind prodyuseri va rejissyori Sarfaraz A`lam.
Eslatib o`tamiz, “Ipak yo`li durdonasi” XIV Toshkent xalqaro kinofestivali joriy yilning 13-18 sentyabr kunlari bo`lib o`tadi. Unda dunyoning 40 ta davlatidan, jumladan, Qozog`iston, Qirg`iziston, Tojikiston, Turkmanistondan 500 dan ortiq kinematograflar ishtirok etmoqda. Kinofestival doirasida 150 ta badiiy, hujjatli va qisqa metrajli filmlar namoyish etiladi.
Tadbirlar va filmlar namoyishining joriy jadvali bilan kinofestivalning rasmiy sayti – tiffest.uz orqali tanishish mumkin.
