Bugungi kunda ko`plab ogohlantirishlarga qaramay hanuzgacha vijdonsiz “tadbirkorlar” tomonidan fuqarolarning pullarini firibgarlik yo`li bilan o`zlashtirilishi borasida faktlar uchramoqda, deya xabar bermoqda "UzAuto Motors".
"Ayni kunlarda ayrim insonlar ishonuvchan xaridorlarga hali sotuvi boshlanmagan "Chevrolet Onix" avtomobilini sotib olish uchun shartnoma tuzishni taklif qiladigan holatlar kuzatilmoqda. Hech shubhasiz, ushbu e`lon ishonuvchan fuqarolarni chalg`itib, keyinchalik ularning pul mablag`larini firibgarlik yo`li bilan o`zlashtirish uchun qilingan, – deyiladi kompaniya xabarida
Joriy yilning 13 oktyabr kuni "UzAuto Motors" kompaniyasiga OLX xizmati orqali hali kontraktasiyasi boshlanmagan "Chevrolet Onix" avtomobilini 160 485 217 so`m qiymatida sotib olish uchun shartnoma tuzish taklifi bilan e`lon joylashtirgan shaxslarning xatti-harakatlari haqida ma`lumot kelib tushgan.
Kompaniya bayonotiga asosan va huquqni muhofaza qilish organlari xodimlarining tezkor harakatlari natijasida fuqaro S.B. va uning sheriklari pul mablag`larini olayotgan vaqtda qo`lga olindi. 15 oktyabr kuni ushbu fuqarolar ustidan jinoiy ish qo`zg`atilgan va unga ko`ra tergov ishlari olib borilmoqda.
Ko`pchilik bunday “tadbirkorlar”ning qurboni bo`lib kelayotgani va natijada na avtomobilni oladi, na pulini. Huquqni muhofaza qilish organlari tomonidan ularning faoliyati to`xtatilganiga qaramay, bu kabi holatlar hali ham davom etmoqda.
"UzAuto Motors" yangi avtomobil xarid qilishni istagida bo`lgan xaridorlardan ogoh bo`lishini hamda faqatgina rasmiy dilerliklarga murojaat qilishlarini so`ramoqda.
UzAvtoSavdo_bot – kompaniyaning rasmiy telegram-boti hisoblanadi. Xaridorlar @UzAvtoSavdo_bot yordamida o`z shartnomasi bo`yicha to`liq ma`lumotni olish, taqdim etilayotgan modellar va avtomobillar narxlari bilan tanishish, sotuvda mavjud avtomobillar va modellar soni haqida ma`lumotga ega bo`lish va shartnoma olish imkoniyatiga ega.
Bundan tashqari, Siz uchun kompaniyaning avtomobilga shartnoma olishning oddiy va qulay usuli bo`lgan UzAvtoSavdo rasmiy ilovasi ishlaydi. Ushbu ilova yordamida siz ishlab chiqarishda mavjud bo`lgan avtomobillarning xususiyatlari va modifikasiyalari bilan tanishishingiz, sizni qiziqtirgan avtomobil qaysi avtosalonda borligini bilishingiz, tanlangan avtomobil uchun joriy navbatni bilishingiz, shuningdek navbatingizni kuzatishingiz mumkin. Yuqoridagilardan tashqari, mobil telefondan "UzAuto Motors" tomonidan ishlab chiqarilgan avtomobilni to`g`ridan-to`g`ri etkazib berish bo`yicha shartnoma tuzish ham mumkin. UzAvtoSavdo ilovasi avtomobil sotib olishda shaffoflikni ta`minlaydi.
“O`zavtosanoat” AJ va "UzAuto Motors"ning rasmiy veb-saytlari va telegram kanallarida kompaniya yangiliklarini kuzatib borishingiz mumkin.
Bundan tashqari, yangi avtomobil sotib olmoqchi bo`lgan xaridorlardan faqat rasmiy dilerlarga murojaat qilishlari so`ralmoqda. Rasmiy dilerlarning to`liq ro`yxati bilan "UzAuto Motors"ning veb-saytida www.uzautomotors.com tanishishingiz mumkin.
Bunday holatlar va noqonuniy xatti-harakatlarning guvohiga aylanib qolsangiz, zudlik bilan kompaniyaning 78 141 77 77 ishonch telefoniga murojaat qilishingiz so`ralmoqda.
