Toshkent viloyatida fuqaro uyida qimorxona va bangixona tashkil etgani aniqlandi. Bu haqda viloyat IIBB matbuot xizmati xabar qildi.
Ma`lum qilinishicha, 22 noyabr kuni soat 01:30larda Chinoz tumani IIB xodimlari tomonidan o`tkazilgan tezkor tadbirda, “Obihayot” MFYda yashovchi 45 yoshli fuqaro Q.I. vaqtincha yashayotgan xonadonida, bir nechta (30-45 yosh orasidagi 6 nafar) fuqaroga pul evaziga tavakkalchilikka asoslangan “qimor” o`yini o`ynash hamda giyohvandlik moddalari iste`mol qilishlari uchun sharoit yaratib berganligi aniqlangan.
Voqea joyidan xolislar ishtirokida 108 dona o`yin kartalari, narda va toshlari, 1 mln 548 ming so`m pul va 5 ta qog`oz o`ramida “marixuana” giyohvandlik moddasi va uni iste`mol qilish uchun mo`ljallangan uskuna daliliy ashyo sifatida hujjatlashtirilib olindi.
Holat yuzasidan Chinoz tumani IIB huzuridagi tergov bo`limi tomonidan, O`zbekiston Respublikasi JKning 273-moddasi 4-qismi bilan jinoyat ishi qo`zg`atilib, tergov harakatlari olib borilmoqda.
