Тошкент вилоятида фуқаро уйида қиморхона ва бангихона ташкил этгани аниқланди. Бу ҳақда вилоят ИИББ матбуот хизмати хабар қилди.
Маълум қилинишича, 22 ноябрь куни соат 01:30ларда Чиноз тумани ИИБ ходимлари томонидан ўтказилган тезкор тадбирда, “Обиҳаёт” МФЙда яшовчи 45 ёшли фуқаро Қ.И. вақтинча яшаётган хонадонида, бир нечта (30-45 ёш орасидаги 6 нафар) фуқарога пул эвазига таваккалчиликка асосланган “қимор” ўйини ўйнаш ҳамда гиёҳвандлик моддалари истеъмол қилишлари учун шароит яратиб берганлиги аниқланган.
Воқеа жойидан холислар иштирокида 108 дона ўйин карталари, нарда ва тошлари, 1 млн 548 минг сўм пул ва 5 та қоғоз ўрамида “марихуана” гиёҳвандлик моддаси ва уни истеъмол қилиш учун мўлжалланган ускуна далилий ашё сифатида ҳужжатлаштирилиб олинди.
Ҳолат юзасидан Чиноз тумани ИИБ ҳузуридаги тергов бўлими томонидан, Ўзбекистон Республикаси ЖКнинг 273-моддаси 4-қисми билан жиноят иши қўзғатилиб, тергов ҳаракатлари олиб борилмоқда.
