Toshkentda “Ipak yo`lida turizm” 27-Toshkent xalqaro turizm yarmarkasi boshlandi

Jamiyat 30.11.2022, 20:07
Toshkentda “Ipak yo`lida turizm” 27-Toshkent xalqaro turizm yarmarkasi boshlandi

Bugun, 30 noyabr kuni Toshkent shahrida “Ipak yo`lida turizm” 27-Toshkent xalqaro turizm yarmarkasi o`z ishini boshladi. “O`zekspomarkaz” Milliy ko`rgazmalar majmuasida yarmarka ochilish marosimi bo`lib o`tdi. Yarmarkani Bosh vazir o`rinbosari – Turizm va madaniy meros vaziri Aziz Abduhakimov ochib berdi.

"Ipak yo`lida turizm” 2022 yilgi Toshkent Xalqaro Turizm Yarmarkasi dunyoning 30 mamlakatidan 300 nafardan ortiq soha vakillarini o`zida to`plagan. Pandemiya sababli ikki yillik tanaffusdan so`ng 2022 yilda Yarmarka to`liq ko`lamda qaytdi, desak adashmaymiz. Uch kun davomida soha mutaxassislari ishtirokida forum va sessiyalar, mahorat darslari, ko`rgazmalar, shuningdek Toshkent Xalqaro Turizm Yarmarkasi tarixida birinchi marta mahalliy hamda xalqaro maydondagi dizaynerlar ishtirokida modalar namoyishi bo`lib o`tadi. Shu bilan birga, turizm sohasi rivojida muhim ahamiyat kasb etuvchi B2B uchrashuvlari o`tkaziladi", - dedi vazir.   

Shundan so`ng "Ipak yo`lida turizm” 2022 yilgi Toshkent Xalqaro Turizm Yarmarkasining ochilishiga bag`ishlab, rasmiy lenta kesish marosimi bo`lib o`tdi, va yarmarka ochiq deb e`lon qilindi. 

Qayd etilganidek, “O`zekspomarkaz” pavilionlarida O`zbekistonning barcha hududlari va turli davlatlar o`zlarining turizm salohiyatini namoyish etgan ko`rgazmalarni taqdim qilmoqda.

 Yarmarkani aylanib, har bir hududning o`ziga xosligi, shuningdek, mashhur brendlarning yuqori darajadagi xizmat ko`rsatish salohiyatlari bilan yaqindan tanishish mumkin bo`ladi. Jumladan, Qashqadaryo viloyati Kitob tumanida tashkil etilgan turizmning o`zgacha geoturzm yo`nalishini rivojlantirish borasidagi sa`i-harakatlari diqqatni tortdi. Qayd etilishicha, Kitob geologiya tabiat bog`i O`zbekistonda geoturizmni rivojlantirish yo`lidagi asosiy ob`ektlardan biri. Geologiya bog`i o`zining geologik merosi bilan O`rta Osiyoda yagona bo`lib, xalqaro darjada tan olingan. Chunki u erda xalqaro tan olingan geologik ob`ektlar bor. Bog`da hozirda qirilib ketgan, qadimda dengiz sharoitida yashagan 18 turdagi hayvon qoldiqlari bor va 407 million yil avval yashagan hayvon qoldiqlari saqlanadi. Hududi 4 ming gekatarni tashkil etgan geologik bog`ga 2022 yilda ilmiy ishlar olib borish maqsadida xorijdan ko`plab sayyohlar — poliontologlar, biologlar tashrif buyurgan. Shuningdek, u erda xalqaro qizil kitobga kiritilgan, kamyob bo`lgan o`simliklar o`sadi. Hozirda geologik bog` geoturizm bo`yicha qator xalqaro loyihalarda ishtirok etmoqda. Endilikda O`rta Osiyoda birinchi bo`lib Yuneskoning geoparklar tarmog`iga ulanish rejalashtirilmoqda. 

 “Ipak yo`lida turizm” 27-Toshkent xalqaro turizm yarmarkasini aylanar ekansiz, xuddu shunday turizmda yangilik bo`lgan ko`plab ma`lumotlar olish, turizm markazlarini kashf etish imkoniyatiga ega bo`lish mumkin. 

Ma`lumot uchun: “O`zekspomarkaz” pavilonlarida “Ipak yo`lida turizm” 27-Toshkent xalqaro turizm yarmarkasi 2 dekabrga qadar davom etadi. 

 

Sharhlar