Бугун, 30 ноябрь куни Тошкент шаҳрида “Ипак йўлида туризм” 27-Тошкент халқаро туризм ярмаркаси ўз ишини бошлади. “Ўзэкспомарказ” Миллий кўргазмалар мажмуасида ярмарканинг очилиш маросими бўлиб ўтди. Ярмаркани Бош вазир ўринбосари – Туризм ва маданий мерос вазири Азиз Абдуҳакимов очиб берди.
"Ипак йўлида туризм” 2022 йилги Тошкент Халқаро Туризм Ярмаркаси дунёнинг 30 мамлакатидан 300 нафардан ортиқ соҳа вакилларини ўзида тўплаган. Пандемия сабабли икки йиллик танаффусдан сўнг 2022 йилда Ярмарка тўлиқ кўламда қайтди, десак адашмаймиз. Уч кун давомида соҳа мутахассислари иштирокида форум ва сессиялар, маҳорат дарслари, кўргазмалар, шунингдек Тошкент Халқаро Туризм Ярмаркаси тарихида биринчи марта маҳаллий ҳамда халқаро майдондаги дизайнерлар иштирокида модалар намойиши бўлиб ўтади. Шу билан бирга, туризм соҳаси ривожида муҳим аҳамият касб этувчи B2B учрашувлари ўтказилади", - деди вазир.
Шундан сўнг "Ипак йўлида туризм” 2022 йилги Тошкент Халқаро Туризм Ярмаркасининг очилишига бағишлаб, расмий лента кесиш маросими бўлиб ўтди ва ярмарка очиқ деб эълон қилинди.
Қайд этилганидек, “Ўзэкспомарказ” павилионларида Ўзбекистоннинг барча ҳудудлари ва турли давлатлар ўзларининг туризм салоҳиятини намойиш этган кўргазмаларни тақдим қилмоқда.
Ярмаркани айланиб, ҳар бир ҳудуднинг ўзига хослиги, шунингдек, машҳур брендларнинг юқори даражадаги хизмат кўрсатиш салоҳиятлари билан яқиндан танишиш мумкин бўлади. Жумладан, Қашқадарё вилояти Китоб туманида ташкил этилган туризмнинг ўзгача — геотуризм йўналишини ривожлантириш борасидаги саъй-ҳаракатлар диққатни тортди. Қайд этилишича, Китоб геология табиат боғи Ўзбекистонда геотуризмни ривожлантириш йўлидаги асосий объектлардан бири. Геология боғи ўзининг геологик мероси билан Ўрта Осиёда ягона бўлиб, халқаро даржада тан олинган. Чунки у ерда халқаро тан олинган геологик объектлар бор. Боғда ҳозирда қирилиб кетган, қадимда денгиз шароитида яшаган 18 турдаги ҳайвон қолдиқлари мавжуд ва 407 миллион йил аввал яшаган ҳайвон қолдиқлари сақланади. Ҳудуди 4 минг гекатарни ташкил этган геологик боғга 2022 йилда илмий ишлар олиб бориш мақсадида хориждан кўплаб сайёҳлар — полионтологлар, биологлар ташриф буюрган. Шунингдек, у ерда халқаро қизил китобга киритилган, камёб бўлган ўсимликлар ўсади. Ҳозирда геологик боғ геотуризм бўйича қатор халқаро лойиҳаларда иштирок этмоқда. Эндиликда Ўрта Осиёда биринчи бўлиб Юнесконинг геопарклар тармоғига уланиш режалаштирилмоқда.
“Ипак йўлида туризм” 27-Тошкент халқаро туризм ярмаркасини айланар экансиз, худду шундай туризмда янгилик бўлган кўплаб маълумотлар олиш, туризм марказларини кашф этиш имкониятига эга бўлиш мумкин.
Маълумот учун: “Ўзэкспомарказ” павилонларида “Ипак йўлида туризм” 27-Тошкент халқаро туризм ярмаркаси 2 декабрга қадар давом этади.
