"Gender zo`ravonlikka qarshi kurashishda sudlarning o`rni" mavzusida xalqaro konferensiya o`tkazildi

Jamiyat 03.12.2022, 22:44
"Gender zo`ravonlikka qarshi kurashishda sudlarning o`rni" mavzusida xalqaro konferensiya o`tkazildi

2 dekabr kuni Toshkentda O`zbekiston Respublikasi Oliy sudi va AQSh Xalqaro taraqqiyot agentligining (USAID) "Sud tizimini mustahkamlash" loyihasi doirasida hamda East-West Management Institute NNTning O`zbekistondagi filiali ko`magida "Gender zo`ravonlikka qarshi kurashishda sudlarning o`rni" mavzusida xalqaro konferensiya o`tkazildi.

Konferensiyaning maqsadi gender tengligini targ`ib qilish va xotin-qizlarning huquqlari va imkoniyatlarini kengaytirish, shuningdek gender zo`ravonligiga qarshi kurashishda sudlarning roli kabi dolzarb masalalarni muhokama qilishdan iborat.

Konferensiyada so`zga chiqqan Oliy sud sudyasi Nodira Xakimova, gender zo`ravonlikka qarshi kurashishda sudlarning o`rni hamda ushbu toifadagi ishlarni ko`rish bo`yicha sud amaliyoti to`g`risida tadbir ishtirokchilariga axborot berdi.

AQSh Xalqaro taraqqiyot agentligining (USAID) "Sud tizimini mustahkamlash" loyihasi rahbari Sonya Prostran, loyihaning gender zo`ravonlikka qarshi kurashish bo`yicha faoliyati haqida taqdimot o`tkazdi.

Qirg`iziston ayol-sudyalar assosiasiyasi raisi Chinara Aydarbekova ayollarning huquq va erkinliklarini samarali himoya qilish, shuningdek jamiyatda gender zo`ravonlikning oldini olishda ayol sudyalar sonini ko`paytirish muhimligi haqida batafsil to`xtalib o`tdi.

Ma`lumot uchun, bugungi kunda sud tizimida faoliyat ko`rsatayotgan 1290 nafar sudyalarning 176 nafari yoki 16 foizi ayol sudyalar hissasiga to`g`ri keladi. Oliy sudda esa jami 73 nafar sudyalardan 12 nafari yoki 20 foizini ayol sudyalar tashkil etadi.

4 nafar ayol sudyalar viloyat sudlari raislari va rais o`rinbosarlari lavozimida, 76 nafar allar esa Sudyalar oliy kengashi, O`zbekiston Respublikasi Oliy sudi va viloyat sudlarida sudya lavozimida, 20 nafar ayollar bo`lsa tuman, shahar va tumanlararo sudlarining raisi lavozimida faoliyat olib bormoqda.
Sudlarda faoliyat ko`rsatayotgan xodimlarning 1.396 nafari yoki qariyb 41 foizi ayollardan iborat.

Shuningdek, O`zbekistonda BMTning Xotin-qizlarga nisbatan kamsitishlarga barham berish bo`yicha Qo`mitasining yakuniy tavsiyalarini amalga oshirish, shuningdek, ayollarga nisbatan zo`ravonlikning oldini olishda sudlarning fuqarolik jamiyati institutlari bilan hamkorligi masalalari ham muhokama qilindi.

Sharhlar