Reseptsiz beriladigan dori vositalari ro`yxatini Sog`liqni saqlash vazirligi tomonidan tasdiqlash bekor qilinadi

2023 yil 1 yanvardan boshlab yangi dori vositalari klinik tadqiqotlarning ijobiy natijasi asosida davlat ro`yxatidan o`tkaziladi.

Alohida dori vositalarini klinik tadqiqotlarsiz davlat ro`yxatidan o`tkazish Sog`liqni saqlash vazirligi tomonidan belgilangan tartibga muvofiq amalga oshiriladi va joyiga chiqqan holda ishlab chiqarish sharoitlarining “Zarur ishlab chiqarish amaliyoti – GMP” talablariga muvofiqligi o`rganilganidan so`ng davlat ro`yxatidan o`tkaziladi.

Shuningdek, reseptsiz beriladigan dori vositalarining ro`yxatini Sog`liqni saqlash vazirligi tomonidan tasdiqlash tartibi bekor qilinadi. 

Dori vositalarining resept bo`yicha va reseptsiz berilishi ularning tibbiyotda qo`llanilishiga doir yo`riqnomalarda belgilangan tartibda amalga oshiriladi.

Dori moddalarini (substansiyalarni) davlat ro`yxatidan o`tkazish tartibi va O`zbekiston Respublikasidan tashqarida amalga oshirilgan dori vositalarining ro`yxatdan o`tkazish natijalarini tan olishda standart namunalarini talab etish ham bekor qilinadi.

Davlat tibbiy sug`urtasi jamg`armasi orqali moliyalashtiriladigan respublika darajasidagi davlat stasionar tibbiyot muassasalarida bemorlarni dori vositalari va tibbiy buyumlar bilan ta`minlash shifoxona orqali amalga oshiriladi. 

Alohida holatlarda shifoxonada bemorlar tomonidan olib kelingan dori vositalari va tibbiy buyumlarni ishlatishga ruxsat berish tartibi esa Sog`liqni saqlash vazirligi tomonidan belgilanadi.

Bemorlarni shifoxonaning o`zida dori vositalari va tibbiy buyumlar bilan ta`minlash respublika darajasidagi shifoxonalarda 2023 yil davomida tajriba-sinov tariqasida amalga oshiriladi.