Bosh prokuratura huzuridagi Departamentning Xo`jaobod tuman bo`limi tomonidan o`tkazilgan tezkor tadbirda, er maydoni olib berishni va`da qilgan iqtisodchi ushlandi. Bu haqda Iqtisodiy jinoyatlarga qarshi kurashish departamenti xabar berdi.
Qayd etilishicha, Andijon viloyati uy-joy kommunal xo`jaligi bosh boshqarmasi huzuridagi ishlab chiqarish boshqarmasi iqtisodchisi M.K. fuqaro J.M.ga Andijon shahar, Toshkent ko`chasidagi qurilishi tugallanmagan binoning 4 sotix er maydonini onlayn-auksion orqali olib berish va kadastr hujjatlarini tayyorlab berishni va`da qiladi.
Buning evaziga 20 000 AQSh dollarini firibgarlik yo`li bilan qo`lga kiritib, ushbu pullar hisobidan 400 AQSh dollarini Xo`jaobod tumanidagi avtomobil bozori yonida qaytarib bergan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo`zg`atilib, tergov harakatlari o`tkazilmoqda.
