Muhokamalar portaliga "Xotin-qizlar va bolalar huquqlari, erkinliklari hamda qonuniy manfaatlarini ishonchli himoya qilish tizimini yanada takomillashtirish munosabati bilan O`zbekiston Respublikasining ayrim qonun hujjatlariga o`zgartish va qo`shimchalar kiritish to`g`risida"gi qonun loyihasi qo`yildi.
Unga ko`ra, 18 yoshga to`lmagan jabrlanuvchining nomusiga tegish, unga nisbatan zo`rlik ishlatib, jinsiy ehtiyojni g`ayritabiiy usulda qondirish, fohishalikka jalb qilish, voyaga etmagan shaxs tavsiflangan pornografik mahsulotni tayyorlash uchun javobgarlik kuchaytirilmoqda.
Ularga nisbatan jazodan muddatidan ilgari shartli ozod qilish yoki jazoni engilrog`i bilan almashtirish qo`llanilmaydi.
Shuningdek, ayolni homilasini sun`iy tushirishga majburlash nomusga tegish yoxud jinsiy ehtiyojni g`ayritabiiy usulda qondirish, shaxsni jinsiy aloqa qilishga majbur etish, 16 yoshga to`lmagan shaxs bilan jinsiy aloqa qilish, unga nisbatan uyatsiz-buzuq harakatlar qilish uchun jazo og`irlashtirilmoqda.
Bundan tashqari, shaxs hayotining sir tutiladigan tomonlarini aks ettiruvchi ma`lumotlarni oshkor qilganlik (intim hayot daxlsizligini buzish) uchun jinoiy javobgarlik belgilanmoqda.
Jamoat joylarida shaxsga shilqimlik qilish, qaddi-qomatini shahvoniy mazmunda tasvirlash, shu mazmundagi so`zlar bilan chaqirish, izohlash, qiyoslash, shahvoniy maylni ko`rsatuvchi harakatlar qilish uchun ma`muriy javobgarlik belgilanmoqda.
Qonun loyihasida shaxsning hayoti va sog`lig`i, erkinligi, sha`ni va qadr qimmatiga, O`zbekiston Respublikasiga, tinchlik va insoniyat xavfsizligiga qarshi jinoyatlar uchun ilgari hukm qilingan shaxslar voyaga etmaganlarga xizmat ko`rsatiladigan ta`lim va sog`liqni saqlash muassasalarida ishlashi taqiqlanmoqda.
